Հոկտեմբերի 26-ին կայացած Երևանի քաղաքապետարանի գործակարգավարական խորհրդակցության ժամանակ քաղաքապետ Տիգրան Ավինյանը հայտարարել է, որ նախորդ շաբաթ տեղի ունեցած քննարկումների արդյունքում որոշում է կայացվել էականորեն ավելացնել արհեստական բանականության (AI/ԱԲ) ոլորտի համար նախատեսված բյուջեն։ Ծրագրի համաձայն՝ ստեղծվելու է Երևանի քաղաքապետարանի՝ արհեստական բանականությամբ թվային երկվորյակը։
Ինչու է դա կարևոր. Քաղաքապետարանի բոլոր վարչություններն ու վարչական շրջաններն ունենալու են իրենց AI-ագենտը (կրկնօրինակը), որն առաջնային փուլում գործելու է որպես խորհրդատվական մարմին։ Ավինյանի խոսքով՝ հետագայում ամենօրյա թղթաբանությունն ավտոմատացվելու է այս համակարգերի միջոցով։ Քաղաքապետն ընդգծել է, որ այն խնդիրների լուծման հարցում, որոնք քաղաքապետարանն այժմ դժվարությամբ է իրականացնում, պետք է ապավինել ԱԲ տեխնոլոգիաներին, և 2027 թվականի ընթացքում բազմաթիվ գործընթացներ արդեն կդառնան ավտոմատացված։
ԱԲ համակարգի ներդրման հիմնական ուղղությունները.
ԱԲ երկվորյակ ագենտներ. Յուրաքանչյուր վարչություն և վարչական շրջան ստանալու է իր AI-կրկնօրինակը, որը սկզբում կաշխատի որպես խորհրդատու:
Փաստաթղթաշրջանառության ավտոմատացում. Ամենօրյա թղթաբանությունը աստիճանաբար կանցնի ավտոմատացված ռեժիմի:
Կադրեր և կիբերանվտանգություն. Նախատեսվում են աշխատակիցների տրեյնինգներ, ինչպես նաև կիբերանվտանգության ուժեղացում՝ քաղաքապետարանի տեխնոլոգիաների կենտրոնի թիմի ներուժով:
Ժամկետները. 2027 թվականի ընթացքում քաղաքային կառավարման բազմաթիվ գործառույթներ ամբողջությամբ ավտոմատացված կլինեն:
