ԱԺ տնտեսական հարցերի մշտական հանձնաժողովում առաջին ընթերցմամբ քննարկվել և դրական եզրակացություն է ստացել «Հայաստանի Հանրապետության հարկային օրենսգրքում լրացումներ և փոփոխություններ կատարելու մասին» օրենքի նախագիծը: Փոփոխությունների նպատակը էլեկտրոնային հսկիչ դրամարկղային մեքենաների (ՀԴՄ) կիրառության ոլորտների ընդլայնումն ու դրանք ավանդական ՀԴՄ-ներին լիարժեք այլընտրանք դարձնելն է:
ՀՀ պետական եկամուտների կոմիտեի (ՊԵԿ) նախագահ Էդուարդ Հակոբյանի պարզաբանմամբ՝ թվային ծառայությունների աճով և տեխնոլոգիական զարգացմամբ պայմանավորված՝ անհրաժեշտություն է առաջացել ներդնել նույնական գործառույթներ ապահովող ավելի ճկուն հարկային գործիքակազմ:
Օրենսդրական հիմնական դրույթները Նախագծով առաջարկվում է միասնականացնել ավանդական և էլեկտրոնային ՀԴՄ-ներին վերաբերող բոլոր այն իրավական դրույթները, որոնք կիրառելի են երկու համակարգերի դեպքում:
Բացի այդ, սահմանվում են հետևյալ կարգավորումները.
Լիազորող նորմի սահմանում. ՀՀ կառավարությանը վերապահվում է էլեկտրոնային ՀԴՄ-ների տեխնիկական պահանջները, հաշվառման ու հաշվառումից հանման կարգը, ինչպես նաև կիրարկման կանոնները սահմանելու լիազորությունը:
Կիրառության շրջանակի հստակեցում. Սահմանվում են այն կոնկրետ ոլորտները, դեպքերը և ժամկետները, երբ կազմակերպությունների, անհատ ձեռնարկատերերի և նոտարների կողմից ապրանքների վաճառքի, աշխատանքների կատարման կամ ծառայությունների մատուցման ժամանակ էլեկտրոնային ՀԴՄ-ի կիրառությունը կլինի պարտադիր:
Հարցուպատասխան և ընթացակարգեր Հանձնաժողովի նիստում պատգամավորների հարցերին ի պատասխան անդրադարձ է կատարվել նաև ՀԴՄ-ների սպասարկման վճարների կառուցվածքին: Օրենսդրական փաթեթը ստացել է հանձնաժողովի դրական եզրակացությունը և կներառվի խորհրդարանի լիագումար նիստերի օրակարգում:
