Շները կրկնօրինակում են Vogue-ին․ նորաձևության հսկան դատի է տվել Dogue պարոդիական ամսագրին

Դատական հայցով պահանջվում է նաև վնասի փոխհատուցում և «Dogue»-ի բոլոր օրինակների հանձնում։

Condé Nast մեդիա հսկան դատական հայց է ներկայացրել «Dogue» անկախ ամսագրի դեմ՝ պնդելով, որ այն «պատճենում է» հանրահայտ Vogue-ը։

«Dogue»-ը Լոս Անջելեսում գործող փոքր ամսագիր է, որը նվիրված է շների նորաձևությանը և վաճառվում է սահմանափակ քանակությամբ՝ ընդամենը մեկ կրպակում՝ Բևեռլի Հիլզում։

Ամսագրի հիմնադիր և գլխավոր խմբագիր Օլգա Պորտնայան հայտարարում է, որ սա պայքար է ոչ միայն իր, այլև բոլոր անկախ ստեղծագործողների համար։ Նրա խոսքով՝ խոշոր ընկերությունները չպետք է կարողանան ճնշել փոքր նախագծերին։

«Dogue»-ը սկիզբ է առել որպես «Coverdogs» Instagram նախագիծ, որտեղ ներկայացվում էին Vogue-ի շապիկների պարոդիաներ՝ շների մասնակցությամբ։ 2021-ին այն դարձել է տպագիր պարբերական։

Պորտնայան ընդգծում է, որ իր նախագիծը հումորային պարոդիա է և չի կարող շփոթություն առաջացնել Vogue-ի հետ։

Հակամարտությունը սրվել է այն բանից հետո, երբ Condé Nast-ը 2024-ին սկսել է «Dogue» անունով սեփական թվային նախագիծը։ 2025-ին ընկերությունը պահանջել է վերանվանել ամսագիրը և վիճարկել է դրա ապրանքանիշը։

Դատական հայցով պահանջվում է նաև վնասի փոխհատուցում և «Dogue»-ի բոլոր օրինակների հանձնում։

Պորտնայան արդեն սկսել է դրամահավաք՝ դատական ծախսերը հոգալու համար և հավաքել է ավելի քան 8000 դոլար։

Condé Nast-ը, իր հերթին, նշում է, որ պաշտպանում է իր մտավոր սեփականությունը և փորձել է հարցը լուծել մինչև դատարան հասնելը։