Disney ընկերությունը ծախսերի կրճատման և հաստիքների օպտիմալացման ռազմավարության շրջանակում փորձառու աշխատակիցներին առաջարկել է վաղաժամկետ կենսաթոշակի անցնել։ Variety-ի տվյալներով՝ համապատասխան ներքին հաղորդագրությունը ստորագրել է ընկերության ավագ փոխնախագահ և մարդկային ռեսուրսների տնօրեն Սոնյա Քոուլմանը:
Նախաձեռնությունն ամբողջությամբ ֆինանսավորվում է կորպորացիայի կողմից և նախատեսված է այն աշխատակիցների համար, ովքեր ցանկանում են ժամանակից շուտ ավարտել կարիերան՝ ստանալով ընդլայնված սոցիալական փաթեթ։
Ծրագրի մասնակցության պայմանները
Ծրագիրը տարածվում է Disney Entertainment-ի, ESPN-ի և կորպորատիվ այլ ստորաբաժանումների վրա։ Մասնակցության հիմնական պահանջներն են.
Տարիքային շեմ. Առնվազն 50 տարեկան,
Աշխատանքային ստաժ. Առնվազն 10 տարվա աշխատանքային փորձ ընկերությունում։
Նշում. Պայմանագրային հիմունքներով աշխատողները չեն կարող մասնակցել այս ծրագրին։
Առաջարկվող արտոնությունների փաթեթը
Ընկերությունում ընդգծում են, որ առաջարկվող պայմանները լիովին հաշվի են առնում աշխատակիցների վաստակն ու ծառայությունը։ Աշխատանքից վաղաժամկետ հեռացողներին առաջարկվում է.
Աշխատանքից ազատվելու նպաստ,
Բաժնետոմսերի օպցիոնների պահպանում,
Բժշկական ապահովագրություն՝ կորպորատիվ արտոնյալ սակագներով,
Disney-ի թեմատիկ զվարճանքի զբոսայգիներ այցելելու հնարավորություն՝ Silver Pass ծրագրի շրջանակում։
Կրճատումների ընդհանուր համատեքստը
Այս քայլն իրականացվում է ընկերությունում շարունակվող զանգվածային կրճատումների ֆոնին, որոնք մեկնարկել են դեռևս հուլիսին։ Հաստիքների օպտիմալացումն ընդգրկել է բազմաթիվ ստորաբաժանումներ, որոնցից ամենամեծ կորուստները կրել է Pixar ստուդիան՝ «Խաղալիքների պատմություն» ֆրանշիզայի հինգերորդ մասի թողարկումից հետո։
