2025 թվականին համաշխարհային բնական աղետների պատճառած վնասը կարող է կազմել 150 միլիարդ դոլար․ Swiss Re

2025 թվականի առաջին կիսամյակում ամբողջ աշխարհում բնական աղետների հետևանքով տնտեսական կորուստները կազմել են 80 միլիարդ դոլար։ Միտումի պահպանման դեպքում՝ երկրորդ կիսամյակի ենթադրյալ կորուստների հետ միասին, տարեկան կորուստները կարող են կազմել 150 միլիարդ դոլար։ Նման կանխատեսում են արել շվեյցարական վերաապահովագրական Swiss Re ընկերության վերլուծաբանները։

2025 թվականի կորուստների ամենամեծ մասը մինչ այժմ պայմանավորված է Լոս Անջելեսի հունվարյան անտառային հրդեհներով, որոնք 40 միլիարդ դոլարի վնաս են պատճառել։

Ըստ ընկերության տվյալների՝ 2025 թվականի երկրորդ կիսամյակում բնական աղետներից տնտեսական կորուստների առումով ամենամեծ վտանգը ներկայացնում է Ատլանտյան օվկիանոսի փոթորիկների սեզոնը։ 2025 թվականի առաջին կիսամյակում փոթորիկներն արդեն իսկ 31 միլիարդ դոլարի վնաս են հասցրել։