Coca-Cola-ն վերջին պահին փորձում է փրկել Costa Coffee-ի վաճառքի գործարքը

Թեև TDR-ը այս շաբաթ ընտրվել էր որպես նախընտրելի գնորդ, կողմերը չեն կարողանում համաձայնության գալ գնի շուրջ։

Reuters-ի փոխանցմամբ՝ Coca-Cola ընկերության կողմից բրիտանական Costa Coffee սրճարանների ցանցի վաճառքը հայտնվել է ձախողման եզրին։ Financial Times-ի տվյալներով՝ ընկերությունը այս հանգստյան օրերին անցկացնում է վերջին բանակցությունները մասնավոր ներդրումային TDR Capital հիմնադրամի հետ՝ փորձելով պահպանել գործարքը։ Թեև TDR-ը այս շաբաթ ընտրվել էր որպես նախընտրելի գնորդ, կողմերը չեն կարողանում համաձայնության գալ գնի շուրջ։

Coca-Cola-ն դեռ օգոստոսին էր սկսել ուսումնասիրել Costa-ի հնարավոր վաճառքը՝ համագործակցելով Lazard ներդրումային բանկի հետ։ Հիշեցնենք, որ 2018 թվականին Coca-Cola-ն Costa Coffee-ն ձեռք էր բերել Whitbread ընկերությունից՝ մոտ 5.1 միլիարդ դոլար գնահատմամբ։ Ներկայում գործարքի ճակատագիրը կախված է առաջիկա օրերին սպասվող բանակցությունների արդյունքից։