Երեխաների թվային անվտանգությունը՝ նախարարությունում քննարկումների օրակարգում

Պետության նպատակը սահմանափակումների կիրառումը չէ։

Հայաստանի բարձր տեխնոլոգիական արդյունաբերության նախարար Մխիթար Հայրապետյանը հանդիպում է ունեցել երեխաների թվային անվտանգությամբ մտահոգված ծնողների հետ՝ քննարկելու խաղային առցանց հարթակների օգտագործման ընթացքում առաջացող ռիսկերը։ Հանդիպմանը մասնակցել է նաև տեղեկատվական անվտանգության հարցերով փորձագետ Սամվել Մարտիրոսյանը։ Տեղեկությունը հաղորդել է նախարարությունը։

Հանդիպումը նախաձեռնվել է նախարարությունում վերջին շրջանում ստացված բազմաթիվ դիմումների հիման վրա, որոնք վերաբերում էին Roblox և այլ նմանատիպ խաղային հարթակների օգտագործմանը երեխաների կողմից։ Քննարկման ընթացքում ծնողները ներկայացրել են իրենց մտահոգությունները և առաջարկները՝ անդրադառնալով առցանց միջավայրում առկա հնարավոր վտանգներին։

Քննարկման ընթացքում շեշտադրվել է այն մոտեցումը, որ թվային ռիսկերի նվազեցումը պետք է իրականացվի ոչ թե արգելքների միջոցով, այլ՝ իրազեկման և կրթական մեխանիզմների կիրառմամբ։ Նշվել է, որ ներկայում գոյություն ունեն գործիքներ և լուծումներ, որոնք կարող են նպաստել անվտանգ օգտմանն ու ռիսկերի վերահսկմանը, սակայն դրանց վերաբերյալ տեղեկատվությունը բավարար չափով հասանելի չէ ծնողների համար։

Նախարար Մխիթար Հայրապետյանը նշել է, որ պետության նպատակը սահմանափակումների կիրառումը չէ, այլ իրազեկվածության վրա հիմնված անվտանգ թվային միջավայրի ձևավորումը։ Ըստ նախարարի՝ թվային անվտանգության խնդիրների լուծումը պետք է հիմնված լինի կրթական և տեղեկատվական գործընթացների վրա։

Տեղեկատվական անվտանգության փորձագետ Սամվել Մարտիրոսյանի գնահատմամբ՝ խաղային հարթակների արգելափակումը արդյունավետ միջոց չէ, քանի որ գոյություն ունեն տեխնիկական շրջանցման բազմաթիվ հնարավորություններ։ Ըստ նրա՝ առանց ծնողների գիտակցված ներգրավվածության հնարավոր չէ ապահովել երեխաների պաշտպանվածությունը թվային միջավայրում։

Քննարկման արդյունքում արձանագրվել է, որ առավել արդյունավետ մոտեցումը ծնողների իրազեկվածության և մեդիագրագիտության բարձրացումն է։ Ընդգծվել է, որ ծնողները պետք է տեղեկացված լինեն երեխաների կողմից օգտագործվող խաղերի, դրանց բովանդակության, հնարավոր ռիսկերի և վերահսկման գործիքների մասին։ Կողմերը պայմանավորվել են շարունակել քննարկումները և համատեղ աշխատանքը թեմայի շուրջ։