Հուլիսի 31-ի բիզնես լուրերը

Տեղական

▪️ ԵԱՏՄ-ի և երրորդ կողմերի մաքսային տարանցման միասնական համակարգ կգործի
Կառավարությունը հավանություն է տվել համաձայնագրի նախագծին, որը միտված է պարզեցնել միջազգային առևտրի ընթացակարգերը և բարելավել ապրանքների տարանցման պայմանները ԵԱՏՄ-ի և երրորդ երկրների մաքսային սահմաններով։

▪️ ՀՀ–ՌԴ առանց մուտքի արտոնագրի ռեժիմի պայմաններում կփոփոխվեն փաստաթղթերը
Կառավարության նիստում փոփոխություններ են կատարվել հայ–ռուսական փոխայցելությունների համաձայնագրում՝ վերացնելով «օտարերկրյա պետություններում գործողության ժամկետի նշումով» ձևակերպումը, ինչը կհեշտացնի տեղաշարժի գործընթացը։

▪️ Վրաստանից ՌԴ է մտել հայկական կոնյակով բարձված 55 բեռնատար․ Պապոյան
Վերջին 3 օրերին 55 բեռնատար հայկական կոնյակ է մուտք գործել Ռուսաստան։ Նախարար Գևորգ Պապոյանը հայտարարել է, որ սա վկայում է արտահանման հիմնախնդրի կարգավորման մասին։ Խաղողի մթերման կազմակերպման ուղղությամբ կառավարությունն աշխատում է արտադրողների և գյուղացիների հետ։

▪️ Հեղուկ գազի շուկայում չկան գերիշխողներ․ գնաճը՝ պահանջարկի հետևանք է. ՄՊՀ
ՄՊՀ-ի ուսումնասիրությունը ցույց է տվել, որ ավելի քան 170 ընկերություն է ներկրում հեղուկ գազ, և դրանցից որևէ մեկը շուկայում գերիշխող դիրք չունի։ Աճը պայմանավորված է Վրաստանում բեռնատարների կուտակումներով և առաջարկի ժամանակավոր անկմամբ։

Միջազգային

▪️ Թրամփը BRICS-ը համարում է հակաամերիկյան միավորում
ԱՄՆ նախագահ Դոնալդ Թրամփը հայտարարել է, որ BRICS-ն ուղղված է ԱՄՆ-ի դեմ և նպատակ ունի նվազեցնել դոլարի դերը՝ որպես համաշխարհային պահուստային արժույթ։ Նա ընդգծել է նաև Հնդկաստանի անդամակցության խնդրահարույց բնույթը։

▪️ Tesla-ն և Samsung-ը ստորագրել են $16.5 միլիարդ արժողությամբ չիպերի պայմանագիր
Համագործակցությունը վերաբերում է նոր սերնդի AI չիպերի արտադրությանը Samsung-ի նոր գործարանում։ Մասկը նշել է, որ նախագծի եկամուտը կարող է մի քանի անգամ գերազանցել պայմանագրով նախատեսված գումարը։

▪️ Հարավային Կորեայի ավտոարդյունաբերությունը կարող է կորցնել $5 միլիարդ ԱՄՆ մաքսատուրքերի պատճառով
Bloomberg-ի տվյալներով՝ ԱՄՆ-ն պատրաստվում է բարձրացնել մաքսատուրքերը Հարավային Կորեայից ներմուծվող ավտոմեքենաների վրա՝ մինչև 15%։ Ավտոարտադրողները փորձում են այդ ազդեցությունը մեղմել՝ արտադրությունն ավելացնելով ԱՄՆ-ում։

▪️ Ֆրանսիայի ՀՆԱ-ն աճել է 0.3%՝ գերազանցելով կանխատեսումները
Երկրորդ եռամսյակում արձանագրվել է 0.3% տնտեսական աճ։ Տարեկան կտրվածքով՝ 0.7%։ Սպառողական ծախսերն աճել են 0.1%-ով՝ տնտեսության կայունացման նշաններ ցույց տալով։

Հետաքրքիր

▪️ Արտահանումը Հայաստանի Հանրապետությունից՝ ըստ երկրների. 2025թ․ հունվար-մայիս
Վիճակագրական տվյալներով՝ այս տարվա հինգ ամիսներին արտահանումը կազմել է 3.02 մլրդ դոլար՝ նվազելով 57.38%-ով։ Ամենաշատ արտահանումը կատարվել է Ռուսաստան՝ 1.1 մլրդ դոլարի չափով, ինչը ընդհանուր արտահանման 36.3%-ն է։ Ռուսաստան արտահանումը նվազել է 7.43%-ով։