Տեղական

▪️Պետական պարտքը՝ 13.85 մլրդ դոլար

ՀՀ վիճակագրական կոմիտեի տվյալներով՝ 2025թ. հունիսի 30-ի դրությամբ Հայաստանի պետական պարտքը կազմել է 13 մլրդ 852 մլն 137 հազար ԱՄՆ դոլար։ Դրանից արտաքին պարտքը կազմում է 6 մլրդ 943 մլն 296 հազար դոլար, իսկ ներքինը՝ 6 մլրդ 908 մլն 842 հազար դոլար։

▪️ Ծաղկի արտահանումը կրկնապատկվել է

Էկոնոմիկայի նախարար Գևորգ Պապոյանը հայտնել է, որ 2025թ. օգոստոսի 3-ի դրությամբ Հայաստանից արտահանվել է 1217 տոննա ծաղիկ, ինչը 2.3 անգամ ավելի է, քան նախորդ տարվա նույն ժամանակահատվածում։ Արտահանված հատերի քանակն աճել է 15%-ով՝ հասնելով ավելի քան 48 հազար հատի։

▪️ Անվճար և փոխհատուցվող դեղեր՝ մինչև 3 ամսվա համար

ՀՀ առողջապահության նախարարության տեղեկացմամբ՝ 2025թ. սեպտեմբերից քաղաքացիները կկարողանան պոլիկլինիկայից ստանալ անվճար և փոխհատուցվող դեղերը 3 ամսվա համար՝ անկախ սոցիալական կարգավիճակից։ Նախկինում դեղերը տրամադրվում էին միայն 1 ամսվա համար։

▪️ Արդյունաբերական արտադրանքի անկում առաջին կիսամյակում

2025թ. հունվար-հունիս ամիսներին արդյունաբերական արտադրանքի ծավալը կազմել է 1 տրլն 257 մլրդ 746.6 մլն դրամ, ինչը 12.1%-ով ցածր է 2024թ. նույն ժամանակահատվածի ցուցանիշից։ Միևնույն ժամանակ հունիսին մեկ ամսվա կտրվածքով արձանագրվել է 2.5% աճ։

Միջազգային

▪️ ԱՄԷ-ն ուզում է կրկնապատկել առևտուրը Ռուսաստանի հետ

ԱՄԷ-ի նախագահ Նահայանը հայտարարել է, որ առաջիկա հինգ տարում նպատակ ունեն կրկնապատկել առևտրաշրջանառությունը Ռուսաստանի հետ։ Ներկայումս այն կազմում է 11.5 մլրդ դոլար։

▪️ ԱՄՆ մաքսատուրքեր՝ ոսկե ձուլակտորների վրա

ԱՄՆ-ն մաքսատուրքեր է սահմանել երկիր ներմուծվող 1 կգ ոսկե ձուլակտորների համար։ Սա կարող է հարվածել Շվեյցարիային, որը համարվում է աշխարհի խոշորագույն ոսկու վերամշակման կենտրոնը և մատակարարում է ԱՄՆ շուկայի հիմնական մասը։

▪️ Գերմանիան ստեղծում է 100 մլրդ եվրոյի հիմնադրամ

Գերմանիան պատրաստվում է գործարկել 100 մլրդ եվրոյի ներդրումային հիմնադրամ, որը կուղղվի պաշտպանության, էներգետիկայի և ռազմավարական ռեսուրսների ապահովման ոլորտներին։ Կառավարությունը տրամադրելու է 10 մլրդ եվրո, մնացածը կգրավվեն մասնավոր ներդրողներից։

▪️ Վրաստանի զբոսաշրջային աճը՝ երկրորդ եռամսյակում

2025թ. երկրորդ եռամսյակում Վրաստան է այցելել 1.8 մլն զբոսաշրջիկ, ինչը 6.9%-ով ավել է նախորդ տարվա ցուցանիշից։ Ամենաշատ այցելուներ գրանցվել են Ռուսաստանից՝ 309.4 հազար մարդ (22.4%):

Հետաքրքիր

▪️ Կենսաբազմազանության ոլորտում՝ մոտ 18 մլն դրամ տուգանք

ԲԸՏՄ-ի տվյալներով՝ 2025թ. առաջին կիսամյակում կենսաբազմազանության ոլորտում արձանագրվել է 703 իրավախախտում։ Կիրառվել է 176 վարչական տույժ և նշանակվել է 17.89 մլն դրամի տուգանք։