Օգոստոսի 7-ի բիզնես լուրերը

Տեղական

▪️ Սննդամթերքի գնաճը Հայաստանում՝ մայիսին կազմել է 5.4%

ԵԱՏՄ տվյալներով՝ 2025 թվականի մայիսին Հայաստանում սննդամթերքի գնաճը կազմել է 5.4%։ Նույն ժամանակահատվածում ԵԱՏՄ-ում սպառողական գների ինդեքսը՝ ապրիլ ամսվա համեմատ, կազմել է 100.5%, իսկ 2024թ. դեկտեմբերի համեմատ՝ 103.9%։

▪️ Էլեկտրաէներգիայի արտադրությունն աճել է 4%-ով

2025 թվականի առաջին կիսամյակում Հայաստանում արտադրվել է 4,694.7 մլն կՎտժ էլեկտրաէներգիա, ինչը 4%-ով գերազանցում է նախորդ տարվա նույն ժամանակահատվածը։ ՋԷԿ-երի արտադրությունը նվազել է 10.5%-ով (1,415.8 մլն կՎտժ), իսկ ՀԷԿ-երի արտադրությունը աճել է 19%-ով՝ կազմելով 1,301.8 մլն կՎտժ։

▪️ Կայացել է ներդրումային ծրագրերին աջակցող միջգերատեսչական հանձնաժողովի նիստ

Փոխվարչապետ Տիգրան Խաչատրյանի գլխավորությամբ անցկացվել է հանձնաժողովի հերթական նիստը։ Քննարկվել են ներդրումային ծրագրերի կարգավիճակները, տրված հանձնարարականների ընթացքը և միջգերատեսչական որոշումներ պահանջող նախաձեռնությունները։

▪️ Օգոստոսի 8-ից ուժի մեջ է մտնում փողերի լվացման դեմ նոր օրենքը

Փոփոխությունները խստացնում են հաշվետվող անձանց ցանկը՝ ներառելով իրավաբանական ծառայություններ մատուցող ԱՁ-ներ, հաշվապահներ, թանկարժեք մետաղների և քարերի դիլերներ, ինչպես նաև գրանցման և կառավարման ծառայություններ մատուցող սուբյեկտներ։ Նրանք պարտավոր են հաշվառվել Ֆինանսական դիտարկումների կենտրոնում՝ օրենքի ուժի մեջ մտնելուց հետո 30 օրվա ընթացքում։

Միջազգային

▪️ ԱՄՆ լրացուցիչ մաքսատուրքերը մտել են ուժի մեջ

ԱՄՆ նախագահ Թրամփի սահմանած լրացուցիչ մաքսատուրքերը պաշտոնապես ուժի մեջ են մտել ԵՄ-ի և այլ երկրների նկատմամբ։ Թրամփը հայտարարել է, որ «միլիարդավոր դոլարներ կհոսեն ԱՄՆ՝ այն երկրներից, որոնք տարիներ շարունակ շահագործել են Ամերիկային»։

▪️ Բրազիլիայի նախագահը ցանկանում է ԲՐԻԿՍ-ում քննարկել ԱՄՆ մաքսատուրքերը

Լուլա դա Սիլվան հայտարարել է, որ կհանդիպի Հնդկաստանի և Չինաստանի ղեկավարների հետ՝ քննարկելու Թրամփի մաքսատուրքերին ԲՐԻԿՍ-ի համատեղ պատասխանը։ Նա քննադատել է ԱՄՆ-ի մուլտիլատերալ համակարգի վրա «հարձակումները»։

▪️ Լատվիայում գյուղատնտեսության ոլորտում արտակարգ դրություն մինչև նոյեմբեր

Լատվիան արտակարգ դրություն է հայտարարել մինչև 2025թ. նոյեմբերի 4-ը՝ սաստիկ եղանակային պայմանների հետևանքով գյուղատնտեսությանը հասցված վնասների պատճառով։ Սա թույլ կտա փոխհատուցել վնասները և հետաձգել ֆերմերների ֆինանսական պարտավորությունները։

▪️ Apple-ը նախատեսում է ներդնել հավելյալ 100 մլրդ դոլար ԱՄՆ-ում

Թրամփի մաքսատուրքերի սպառնալիքի պայմաններում Apple-ը հայտարարել է, որ կավելացնի իր ներդրումները ԱՄՆ-ում՝ նոր արտադրական համալիրներ կառուցելով։ Ըստ պլանների՝ ընդհանուր ներդրումներն առաջիկա տարիներին կկազմեն շուրջ 600 մլրդ դոլար։

Հետաքրքիր

▪️ «Ֆեստիվառ» փառատոնի համար կառավարությունը կհատկացնի 211 մլն դրամ

ՀՀ կառավարությունը կհատկացնի 211 մլն դրամ՝ ՀՀ մարզերում անցկացվող «Ֆեստիվառ» զբոսաշրջային-երաժշտական փառատոնի պատշաճ կազմակերպման նպատակով։ Այն իրականացվում է ԿԳՄՍՆ-ի կողմից՝ 2025 թ. պետական բյուջեի վերաբաշխման շրջանակում։ Փառատոնը խթանում է ներքին զբոսաշրջությունն ու մարզային մշակութային կյանքը։