Մեծ Բրիտանիան կճանաչի Պաղեստինի պետությունը, եթե Իսրայելը չկատարի մի շարք պայմաններ. Սթարմեր

Իսրայելը պետք է համաձայնի հրադադարին և պարտավորվի աշխատել կայուն խաղաղ գործընթացի վրա:

Մեծ Բրիտանիայի վարչապետ Քիր Սթարմերը հայտարարել է, որ Լոնդոնը մտադիր է ճանաչել Պաղեստին Պետությունը սեպտեմբերին ՄԱԿ-ի Գլխավոր ասամբլեայի նստաշրջանում, եթե «Իսրայելի կառավարությունը նշանակալի քայլեր չձեռնարկի Գազայում սարսափելի իրավիճակին վերջ տալու համար»։ Այս մասին հայտնում է BBC-ն:

Սթարմերը պարզաբանել է, որ Իսրայելը պետք է համաձայնի հրադադարին և պարտավորվի աշխատել կայուն խաղաղ գործընթացի վրա՝ ակտիվացնելով «երկու պետություն երկու ժողովուրդի համար» հեռանկարը:

Մեծ Բրիտանիայի վարչապետը նաև ասել է, որ ՀԱՄԱՍ-ը պետք է ազատ արձակի մնացած պատանդներին, համաձայնի հրադադարին, վայր դնի զենքերը և ընդունի, որ խմբավորումը որևէ դեր չի ունենալու Գազայի հատվածի կառավարման գործում։

Սթարմերի գրասենյակը հայտնել է, որ «պաղեստինյան պետության ճանաչումը չի փոխի իրավիճակը տեղում»։

Այդ պատճառով Մեծ Բրիտանիան մտադիր է Հորդանանի հետ համատեղ օդով հումանիտար բեռներ հասցնել Գազայի հատված, ինչպես նաև բրիտանական հիվանդանոցներ տեղափոխել վիրավոր պաղեստինցի երեխաներին։

Ֆրանսիայի արտաքին գործերի նախարար Ժան-Նոել Բարոն ողջունել է Մեծ Բրիտանիայի որոշումը Պաղեստին Պետության ճանաչման հարցում:

Եթե Մեծ Բրիտանիան նման որոշում կայացնի, նա կդառնա երկրորդ արևմտյան տերությունը ՄԱԿ-ի Անվտանգության խորհրդում՝ Ֆրանսիայից հետո: Դա արտացոլում է Իսրայելի խորացող մեկուսացումը՝ կապված Գազայի հատվածում ՀԱՄԱՍ-ի դեմ նրա գործողությունների հետ, ինչի հետևանքով հումանիտար աղետ է բռնկվել, և պաղեստինցիների զոհերի թիվը գերազանցել է 60000-ը, գրում է Reuters-ը: