Ադրբեջանն ու Իսրայելը պայմանավորվել են համագործակցել արհեստական բանականության ոլորտում

Հուշագիրը նպատակ ունի ձևավորել տեխնոլոգիական համագործակցության գործնական հարթակ

Ադրբեջանն ու Իսրայելը համաձայնել են համագործակցել գերհամակարգիչների մշակման ոլորտում՝ արհեստական բանականության վերաբերյալ ստորագրված հուշագրի շրջանակներում։ Այդ մասին հայտնում են իսրայելական և ադրբեջանական լրատվամիջոցները։

Ադրբեջանում Իսրայելի դեսպանատնից հայտնել են, որ փաստաթուղթը նախատեսում է համագործակցություն մի շարք ուղղություններով, այդ թվում՝ քաղաքացիական նշանակության արհեստական բանականության հավելվածների մշակում, մասնագետների պատրաստում և համատեղ գիտական հետազոտությունների իրականացում։

Հուշագիրը նպատակ ունի ձևավորել տեխնոլոգիական համագործակցության գործնական հարթակ՝ բարձր հաշվարկային հզորությունների և արհեստական բանականության կիրառությունների զարգացման համար։

Իսրայելի դեսպան Ռոնեն Կրաուսի խոսքով՝ ստորագրված փաստաթուղթը արտացոլում է Բաքվի և Թել Ավիվի միջև տեխնոլոգիական և ռազմավարական համագործակցության ընդլայնումը։ Նա նշել է, որ համաձայնությունը միտված է երկարաժամկետ գործընկերության ամրապնդմանը բարձր տեխնոլոգիաների ոլորտում։