Հայկական ներուժի բացահայտումը գլոբալ տեխնոլոգիական առաջնորդների համար

Փետրվարի 13-ին, Հայաստանում Ամերիկայի առևտրի պալատը Հայաստանում ՀԿ-ն (ԱԱՊՀ, AmCham Armenia) Մքքանն (McCANN) միջազգային մարքեթինգային ընկերության հետ համատեղ կազմակերպել էր քննարկում՝ «Հայկական ներուժի բացահայտումը գլոբալ տեխնոլոգիական առաջնորդների համար» թեմայով։

Քննարկմանը ներկա էին կառավարության բարձրաստիճան պաշտոնյաներ, ոլորտի առաջնորդներ և միջազգային գործընկերներ՝ «Հայկական ներուժի բացահայտումը գլոբալ տեխնոլոգիական առաջնորդների համար» խորագրով պանելային քննարկմանը մասնակցելու համար: Միջոցառման առանցքում Հայաստանի՝ որպես համաշխարհային տեխնոլոգիական ներդրումների համար մրցունակ և հուսալի ուղղության դիրքերի ամրապնդումն էր:

Բացման խոսքով հանդես եկավ Հայաստանում Ամերիկայի առևտրի պալատի նախագահ Էլինա Մարգարյանը, ով ընդգծեց ԱՄՆ-Հայաստան հարաբերություններում աճող դինամիկան՝ անդրադառնալով նաև ԱՄՆ փոխնախագահ Ջեյ Դի Վենսի վերջին այցին և արհեստական բանականության, կիսահաղորդիչների, էներգետիկայի ու սահմանային անվտանգության ոլորտներում համագործակցության ընդլայնմանը։ Նա նշեց, որ Հայաստանը աստիճանաբար ձևավորվում է որպես վստահելի և հեռանկարային տեխնոլոգիական հանգույց։

Ողջույնի խոսքով հանդես եկավ նաև ՀՀ բարձր տեխնոլոգիական արդյունաբերության նախարարի տեղակալ Ռուբեն Սիմոնյանը, ով ներկայացրեց կառավարության ռազմավարական տեսլականը՝ ուղղված երկրի բարձր տեխնոլոգիական էկոհամակարգի զարգացմանը և համաշխարհային տեխնոլոգիական առաջնորդների ներգրավմանը:

ԱՄՆ դեսպանատան Էկոնոմիկայի և կոմերցիոն բաժնի ղեկավար Էդվարդ Էյքլերը հանդես եկավ բացման խոսքով, իր ելույթում կարևորելով նմանատիպ նախաձեռնությունների դերը ԱՄՆ-Հայաստան երկկողմանի փոխհարաբերությունների խորացման համատեքստում։ Ներդրումների աջակցման կենտրոնի (Enterprise Armenia) արտաքին կապերի կրտսեր մենեջեր Աննա Դավթյանը ներկայացրեց ներդրումային միջավայրի կարևորություն Հայաստանում՝ շեշտելով առկա հնարավորությունները և զարգացման  ուղիները։

Պանելային քննարկման ընթացքում միջազգային տեխնոլոգիական ընկերությունների և ոլորտային կառույցների ներկայացուցիչները կիսվեցին իրենց փորձով և դիտարկումներով՝ անդրադառնալով Հայաստանի ներդրումային միջավայրին, մարդկային կապիտալի ներուժին, ենթակառուցվածքների պատրաստվածությանը և կարգավորող դաշտին։ Քննարկվեցին ինչպես հնարավորությունները, այնպես էլ մարտահրավերները, որոնք կարող են ազդել համաշխարհային տեխնոլոգիական քարտեզում Հայաստանի դիրքավորման վրա։

Միջոցառումը եզրափակվել է պետական և մասնավոր հատվածների համատեղ հանձնառությամբ՝ շարունակել ձևավորել կանխատեսելի, թափանցիկ և նորարարությանը միտված միջավայր, որտեղ գլոբալ տեխնոլոգիական առաջատարները կարող են ներդրումներ կատարել և զարգանալ՝ նպաստելով երկրի կայուն տնտեսական աճին։

*գովազդ