Հայ-իրանական համատեղ տոն․ Սյունիքում 4-րդ անգամ կանցկացվի «Նավասարդ» փառատոնը

Փառատոնը նպաստում է Հայաստանի ու Իրանի մշակութային ու զբոսաշրջային կապերի զարգացմանը և մարզային զբոսաշրջության խթանմանը։

Օգոստոսի 10-ին Սիսիանում կկայանա հայ-իրանական «Նավասարդ» խոհանոցային և մշակութային փառատոնը, որն անցկացվում է Զբոսաշրջության կոմիտեի, Տուրիզմի հայկական ֆեդերացիայի և «Հայ խոհարարական ավանդույթների զարգացման ու պահպանման» ՀԿ-ի նախաձեռնությամբ։ Փառատոնը նպաստում է Հայաստանի ու Իրանի մշակութային ու զբոսաշրջային կապերի զարգացմանը և մարզային զբոսաշրջության խթանմանը։ 

Միջոցառումը կմեկնարկի ժամը 16:00-ին, նախատեսված են շուրջ 100 տաղավարներ, հայկական և իրանական ուտեստներ, մշակութային ծրագրեր ու խոհարարական մրցույթ։ Զբոսաշրջության կոմիտեն նշում է, որ նման միջոցառումները խթանում են միջազգային զբոսաշրջությունը, անգամ այն տարածքներում, որոնք երբեմն ներկայացվում են որպես ոչ անվտանգ։ 2023-ին Հայաստան է այցելել մոտ 180 հազար զբոսաշրջիկ Իրանից, ինչը 30 հազարով գերազանցում է նախորդ տարվա ցուցանիշը։