Ավարտվել է MITT 2026 միջազգային զբոսաշրջային ցուցահանդեսը, որի շրջանակում ՀՀ էկոնոմիկայի նախարարության Զբոսաշրջության կոմիտեն հայկական զբոսաշրջային ընկերությունների հետ համատեղ ներկայացրել է Հայաստանի զբոսաշրջային ներուժն ու առաջարկները։
Ցուցահանդեսի ընթացքում ՀՀ Զբոսաշրջության կոմիտեի նախագահ Լուսինե Գևորգյանը հանդիպումներ է ունեցել միջազգային գործընկերների և ոլորտային ներկայացուցիչների հետ։
Մասնավորապես, հանդիպումներ են կայացել ՌԴ տնտեսական զարգացման նախարարության բազմակողմ տնտեսական համագործակցության և հատուկ նախագծերի վարչության պետ Նիկիտա Կոնդրատևի, վարչության պետի տեղակալ Իգոր Մաքսիմովի, ինչպես նաև Մոսկվայի զբոսաշրջության կոմիտեի ղեկավար Եվգենի Կոզլովի հետ։
Քննարկումների ընթացքում անդրադարձ է կատարվել զբոսաշրջության ոլորտում համագործակցության զարգացման հնարավորություններին, ոլորտում արձանագրված վերջին զարգացումներին, ինչպես նաև կարևորվել է պետական և մասնավոր հատվածների միջև կապերի ընդլայնումը։
Զբոսաշրջության կոմիտեից նշում են, որ MITT 2026 ցուցահանդեսը ևս մեկ կարևոր հարթակ էր՝ Հայաստանը որպես զբոսաշրջային ուղղություն միջազգային հարթակում ներկայացնելու համար։
