Apple-ը նախատեսում է ավելացնել ներդրումները Չինաստանում՝ խորացնելով համագործակցությունը

Apple Inc.-ը մտադիր է շարունակել ներդրումների ավելացումը Չինաստանում բիզնեսի զարգացման և փոխշահավետ համագործակցության խորացման նպատակով, հայտարարել է ընկերության գլխավոր գործադիր տնօրեն Թիմ Քուքը՝ Չինաստանի արդյունաբերության և տեղեկատվական տեխնոլոգիաների նախարար Լի ԼեՉենի հետ հանդիպման ընթացքում։


Նախարարը նշել է, որ Չինաստանի հսկայական ներքին շուկան և ամբողջական արդյունաբերական համակարգը ունեն մեծ ներուժ ներդրումների և սպառման ոլորտում։


«Հուսով ենք, որ Apple-ը կշարունակի զարգացնել իր ներկայությունը չինական շուկայում, կդառնա Չինաստանի նեոարդյունաբերականացման ակտիվ մասնակից և չինական ընկերությունների հետ միասին կխթանի նորարարական զարգացումը ողջ արտադրական շղթայում», – ասել է պաշտոնյան։


Նա հավելել է, որ Չինաստանը շարունակելու է բաց քաղաքականությունը արտաքին աշխարհի հանդեպ, կխթանի խելացի տեխնոլոգիաների կիրառումը արդյունաբերության ոլորտում և կաջակցի խելացի փոխակերպմանը։ Բացի այդ, կառավարությունը կձգտի ապահովել բարենպաստ բիզնես միջավայր արտասահմանյան կապիտալով գործող ընկերությունների համար, ներառյալ՝ Apple-ի։