Amazon-ի եկամուտը գերազանցել է սպասելիքները, սակայն ներդրողներն անհանգստացած

Ընկերության մաքուր շահույթը կազմել է 18.2 միլիարդ դոլար։

2025 թվականի երկրորդ եռամսյակում Amazon-ը ներկայացրել է ակնկալություններից բարձր ֆինանսական արդյունքներ։ Ընկերության մաքուր շահույթը կազմել է 18.2 միլիարդ դոլար, ինչը 33 տոկոսով ավել է նախորդ տարվա նույն ժամանակահատվածի համեմատ։ Մեկ բաժնետոմսի հաշվով շահույթը կազմել է 1.68 դոլար՝ գերազանցելով վերլուծաբանների կանխատեսած 1.33 դոլարը։ Եկամուտը նույնպես աճել է 13 տոկոսով՝ հասնելով 167.7 միլիարդ դոլարի՝ կրկին գերազանցելով կանխատեսված 162.2 միլիարդը։

Աճ է գրանցվել ինչպես ապրանքների, այնպես էլ ծառայությունների վաճառքում։ Ապրանքների վաճառքից ստացված եկամուտը կազմել է 68.2 միլիարդ դոլար՝ աճելով 10.8 տոկոսով, իսկ ծառայություններից՝ 99.5 միլիարդ, աճը՝ 15.1 տոկոս։ Հյուսիսային Ամերիկայում առցանց վաճառքից եկամուտը կազմել է 100.1 միլիարդ դոլար՝ տարեկան կտրվածքով 11 տոկոս աճով, իսկ միջազգային շուկաներում՝ 36.8 միլիարդ դոլար՝ 16 տոկոս աճով։

Amazon Web Services-ի եկամուտը կազմել է 30.9 միլիարդ դոլար՝ տարեկան աճը 17.5 տոկոս է։ Վերլուծաբանները սպասում էին 30.8 միլիարդ։ Գովազդային բիզնեսից եկամուտը հասել է 15.69 միլիարդ դոլարի, ինչը 23 տոկոսով ավելի է, քան նախորդ տարի։ Սա նույնպես գերազանցել է վերլուծաբանների՝ 14.9 միլիարդ դոլարի կանխատեսումը։

Չնայած դրական ցուցանիշներին՝ Amazon-ի բաժնետոմսերը կտրուկ էժանացել են։ Պատճառը ընկերության երրորդ եռամսյակի համար ներկայացրած գործառնական շահույթի կանխատեսումներն են, որոնք ներդրողներին չեն գոհացրել։ Ընկերությունը սպասում է 174-179.5 միլիարդ դոլար եկամուտ և 15.5-20.5 միլիարդ դոլար գործառնական շահույթ։ Վերլուծաբանների կանխատեսումները ավելի բարձր են՝ համապատասխանաբար 173.27 միլիարդ և 19.4 միլիարդ դոլար։