AI-ը սահմանափակում է երիտասարդների զբաղվածության շուկան

AI-ը վտանգավոր է այն ոլորտների համար, որտեղ այն ավտոմատացնում է մարդկանց աշխատանքը, ոչ թե օգնում կատարել այն ավելի արդյունավետ։

Սթենֆորդի համալսարանի նոր ուսումնասիրությունը ցույց է տալիս, որ արհեստական բանականության (AI) արագ զարգացումը ոչ միայն փոխում է աշխատաշուկան, այլև կրճատում աշխատատեղերը, հատկապես, երիտասարդների շրջանում։

Ուսումնասիրությունն ընդգրկել է 2021-2025թթ․ ժամանակահատվածը։ Այս ընթացքում ընդհանուր աշխատատեղերն աճել են, սակայն 22-25 տարեկան աշխատողների զբաղվածության աճը կանգ է առել դեռևս 2022-ի վերջին՝ հենց այն ժամանակ, երբ լայն տարածում գտավ ChatGPT-ն և AI գործիքների նոր սերունդը։

Ուսումնասիրության գլխավոր եզրակացությունը հստակ է․ AI-ը վտանգավոր է այն ոլորտների համար, որտեղ այն ավտոմատացնում է մարդկանց աշխատանքը, ոչ թե օգնում կատարել այն ավելի արդյունավետ։ Իսկ այն մասնագիտություններում, որտեղ AI-ը լրացնում է մարդկանց հմտությունները, աշխատատեղերը պահպանվել կամ նույնիսկ աճել են։

Սակայն լավ լուրեր ևս կան․ այն մասնագիտություններում, որտեղ AI-ը օգնում է աշխատողներին, ոչ թե փոխարինում նրանց, աշխատավարձերի վրա բացասական ազդեցություն չի նկատվել։ Բացի այդ, այն ոլորտները, որոնք ներառում են մարդկային շփում, խնամք, ֆիզիկական աշխատանք կամ ստեղծագործական մոտեցում, ավելի պաշտպանված են AI-ի ազդեցությունից։