Մոտ 10 երկիր պատրաստ է զորք ուղարկել Ուկրաինա. Bloomberg

Սպիտակ տան մամուլի քարտուղար Քերոլայն Լևիթն օգոստոսի 19-ին հայտարարել էր, որ ԱՄՆ նախագահ Դոնալդ Թրամփը «վերջնականապես բացառել է» ամերիկյան զորքերի ուղարկումն Ուկրաինա անվտանգության երաշխիքների շրջանակներում:

Եվրոպացի առաջնորդներն օգոստոսի 19-ին՝ առցանց հանդիպման ժամանակ, քննարկել են Ուկրաինա բրիտանական և ֆրանսիական զորքեր ուղարկելու ծրագիրը՝ Կիևի և Մոսկվայի միջև ապագա խաղաղության համաձայնագրի շրջանակներում։ Մասնավորապես, քննարկվել են զորքերի թվաքանակն ու տեղակայման վայրերը, հաղորդում է Bloomberg-ը՝ հղում անելով անանուն աղբյուրներին։ Նրանց տվյալներով՝ մոտ 10 երկիր, այդ թվում՝ Մեծ Բրիտանիան և Ֆրանսիան, հայտարարել են իրենց զորքերը Ուկրաինա ուղարկելու պատրաստակամության մասին։

Եվրոպացիների մշակած ծրագրի առաջին փուլը, Bloomberg-ի զրուցակիցների տվյալներով, ենթադրում է Ուկրաինայի զինված ուժերի ամրապնդում՝ ուկրաինացի զինվորականների մարզման և անձնակազմի համալրման միջոցով: Պարբերականը նշում է, որ դա կիրականացնի «հիմնականում եվրոպական զորքերից բաղկացած բազմազգ զորախումբը», ներառյալ՝ Մեծ Բրիտանիայի ու Ֆրանսիայի «հարյուրավոր» զինվորները, որոնք կտեղակայվեն Ուկրաինայում՝ առաջնագծից հեռու։

Ծրագրի մեկ այլ մասը, ինչպես գրում է Bloomberg-ը, նախատեսում է Միացյալ Նահանգների աջակցությունը, որը կներառի հետախուզական տվյալների փոխանակում, սահմանային հսկողություն, զենքի և, հնարավոր է, հակաօդային պաշտպանության միջոցների մատակարարում։

Սպիտակ տան մամուլի քարտուղար Քերոլայն Լևիթն օգոստոսի 19-ին հայտարարել էր, որ ԱՄՆ նախագահ Դոնալդ Թրամփը «վերջնականապես բացառել է» ամերիկյան զորքերի ուղարկումն Ուկրաինա անվտանգության երաշխիքների շրջանակներում: Ինքը՝ Թրամփը, Fox News հեռուստաալիքով Fox & Friends ծրագրին տված հարցազրույցում նշել է, որ Վաշինգտոնը, հնարավոր է, Ուկրաինային ավիացիոն աջակցություն ցուցաբերի։

Մեծ Բրիտանիայի կառավարության հրապարակած հայտարարության մեջ էլ ասվում է, որ ամերիկացի գործընկերների հետ երաշխիքները կհամաձայնեցվեն առաջիկա օրերին: