Գործարարներն առաջարկում են զրոյացնել թեյի, սուրճի և մրգի ներմուծման մաքսատուրքերը

Նման առաջարկով «Ռուսպրոդսոյուզ»-ը նամակ է հղել էկոնոմիկայի նախարարությանը,- հաղորդում է «Известия»-ն: Դրանում ասոցիացիան առաջարկել է վերացնել ներմուծման մաքսատուրքերը այն ապրանքների համար, որոնք ընդհանրապես չեն արտադրվում Ռուսաստանում, մասնավորապես ՝ կլիմայական պատճառներով։ Խոսքը թեյի, սուրճի, արևադարձային մրգերի մասին է։ Ցանկում ներառված են նաև քաղցրացուցիչներ, հավելումներ մսի և երշիկեղենի համար, սարքավորումներ, փաթեթավորում և այլն: Այս միջոցը կնվազեցնի արտադրության արժեքը, կարծում են «Ռուսպրոդսոյուզ»-ում։ «Թեյի և սուրճի արդյունաբերությունը ներմուծվող ապրանքներից ամենից կախվածներից մեկն է։ Բնական եղանակային և կլիմայական պայմանների պատճառով դրա համար գրեթե ամբողջ հումքը, բաղադրիչները և հարակից այլ ապրանքները ձեռք են բերվում միջազգային շուկաներից»,- պարզաբանել է Ասոցիացիայի խորհրդի նախագահի տեղակալ Դմիտրի Լեոնովը։ Ներմուծվող ապրանքների մաքսատուրքերը ներկայումս տատանվում են 5%-ից մինչև 15%: Օրինակ՝ բանանի, խուրմայի, նարնջի ներկրողները վճարում են 1 կգ-ի արժեքի 5%-ը։ Թեյի սակագինը կարող է հասնել 12,5%-ի։ 2022 թվականի մարտի կեսերին վարչապետ Միխայիլ Միշուստինը հանձնարարել է ստեղծել ներմուծվող կարևոր ապրանքների ցանկ, որոնց համար անհրաժեշտ է պարզեցնել մաքսազերծումը և զրոյացնել ներմուծման մաքսատուրքերը։ Տուրքերի զրոյացումը կազդի սպառողի համար ապրանքների վերջնական արժեքի վրա, քանի որ խոսքը գնում է առավելագույն դրույքաչափը 15%-ից զրոյի իջեցնելու մասին, -ասել է Տնտեսագիտության բարձրագույն դպրոցի Համաշխարհային տնտեսության և Միջազգային հարաբերությունների ֆակուլտետի պրոֆեսոր Ալեքսեյ Պորտանսկին։ Նրա խոսքով՝ արեւմտյան երկրներում արդյունաբերական ապրանքների միջին դրույքաչափը չի գերազանցում 4 տոկոսը։