Ի՞նչ խնդիր է փորձում լուծել Ադրբեջանը Լաչինի միջանցքում

Վերջին օրերին ակտիվացել են ադրբեջանական սադրանքները Լաչինի միջանցքի շուրջ: Դեկտեմբերի 3-ին իբրև թե ադրբեջանցի բնապահպանները մի քանի ժամով փակեցին միջանցքը, այնուհետև Ադրբեջանից պատվիրակություններ սկսեցին ժամանել Արցախ՝ բնապահպանական հարցեր քննարկելու նպատակով: Հարց սկսեց բարձրացվել Լաչինի միջանցքի վրա ադրբեջանական անցակետ տեղադրելու, ռուս խաղաղապահների հետ միասին անցնող բեռների դիտարկում անցկացնելու, միջանցքով անցնող բեռների և անհատների մասին տեղեկատվությունն Ադրբեջանին փոխանցելու անհրաժեշտության վերաբերյալ և այլն: Դրան գումարվում են վերջին օրերին իբրև թե ադրբեջանցի լրագրողների՝ Իվանյան մուտք գործելու փորձերը, իբրև թե վարորդների կողմից կազմակերպված ծեծկռտուքը և այլն: Այսկերպ Ադրբեջանի իշխանությունը, ինքը կարծես թե անմասն մնալով այս ամենից, միաժամանակ մի քանի հարց է փորձում լուծել: