«Անհնար է». Մակրոնը մերժում է Պուտինի պահանջը՝ ռուսական գազի դիմաց վճարել ռուբլով

Ֆրանսիայի նախագահ Էմանուել Մակրոնը հայտարարել է, որ Վլադիմիր Պուտինի՝ ռուսական գազի դիմաց վճարումները ռուբլով փոխանցելու պահանջը փորձ է շրջանցել Ռուսաստանի դեմ ուկրաինական պատերազմի համար սահմանված պատժամիջոցները։ «Սա չի համապատասխանում մեր ստորագրածին, և ես չեմ հասկանում, թե ինչու մենք պետք է դա անենք», - Մակրոնի խոսքերը մեջբերել է «Ամերիկայի Ձայն»-ը:   Ֆրանսիայի նախագահն ասել է, որ վերլուծաբանները շարունակում են ուսումնասիրել Կրեմլի հայտարարությունը, սակայն ըստ նրա, բոլոր ստորագրված փաստաթղթերը ցույց են տալիս, որ դա արգելված է։Հետևաբար, եվրոպացիները, ովքեր գազ են գնում և գտնվում են եվրոպական հողի վրա, դա պետք է անեն եվրոյով։ Հիշեցնենք որ մարտի 23-ին ՌԴ նախագահ Վլադիմիր Պուտինը հանձնարարել է կառավարությանը և Ռուսաստանի Դաշնության Կենտրոնական բանկին եվրոպական երկրներ ռուսական գազի մատակարարումների դիմաց վճարումները կատարել ռուբլիով։ Ուկրաինայի արտաքին գործերի նախարար Դմիտրի Կուլեբան՝ անդրադառնալով այս պահանջին այն անվանել է  նվաստացուցիչ է, նշելով , որ «նավթի և գազի համար ռուբլով վճարելը նույնն է, որ մի ձեռքով օգնես Ուկրաինային, իսկ մյուսով օգնես ռուսներին սպանել ուկրաինացիներին»։