Ատլանտյան օվկիանոսով հեղուկ բնական գազի տեղափոխման արժեքը պատմական բարձր մակարդակի է հասել․ Bloomberg

Ատլանտյան օվկիանոսում հեղուկացված բնական գազի (LNG) փոխադրման համար նավերի վարձակալության արժեքը հասել է առավելագույնին ՝ օրական գերազանցելով $397,000-ը։ Այս մասին հայտնում է Bloomberg-ը ՝ վկայակոչելով թրեյդերներին և Spark Commodities-ի տվյալները։ Երեքշաբթի օրը Ատլանտյան օվկիանոսում LNG նավի վարձակալության արժեքը բարձրացել է օրական 397,500 դոլարի ՝ գերազանցելով Խաղաղ օվկիանոսում անցած տարի սահմանած ռեկորդային բարձր ցուցանիշը: Գործակալության տվյալներով ՝ LNG նավերի վարձակալության գներն այնքան կտրուկ աճել են, քանի որ Եվրոպան փորձում է ձմռանն ընդառաջ վառելիք կուտակել: Ընդ որում, մինչև տարեվերջ անվճար նավերը շատ քիչ են, իսկ նրանք, որոնք կան, վարձակալվում են թանկ գնով։ Բացի այդ, խոշոր էներգետիկ ընկերությունները հրաժարվում են վարձակալել իրենց նավերը, քանի որ վախենում են մնալ առանց ազատ նավատորմի, երբ դա անհրաժեշտ լինի։ Bloomberg-ը հավելել է, որ նավերի պակասի հետ կապված իրավիճակը հասել է այն աստիճանի, որ Ասիայում LNG մատակարարներն արդեն գազ են առաջարկում բեռնման նավահանգիստներից։ Միաժամանակ նավեր չունեցողները գնորդներ են փնտրում փոխադրման հնարավորությամբ։ Հունիսի սկզբին Financial Times-ը հայտնել էր, որ LNG լցանավերի բեռնափոխադրումների արժեքը մոտեցել է տասը տարվա առավելագույնին: Clarksons Platou Securities-ի տվյալներով՝ բեռնափոխադրումների գինը հասել է օրական 120 հազար դոլարի։