Հայաստանը ստանում է ԵՄ-ից աննախադեպ աջակցություն. ի՞նչ նպատակների համար Եվրոպական միությունը հաստատել է Հայաստանին 10 միլիոն եվրոյի աջակցություն տրամադրելու որոշումը Խաղաղության եվրոպական հիմնադրամից: Սա առաջին անգամն է, որ ԵՄ-ն տրամադրում է աջակցություն այս հիմնադրամից Հայաստանին: Աջակցության նպատակը Հայաստանի զինված ուժերի նյութատեխնիկական կարողությունների բարձրացումն է և խաղաղ բնակչության պաշտպանության բարելավումը ճգնաժամային և արտակարգ իրավիճակներում: Այս աջակցությունը հնարավորություն կտա լիարժեք վրանային ճամբար ապահովել գումարտակի չափով ստորաբաժանման համար: Բրյուսելում «Արմենպրես»-ի թղթակցի փոխանցմամբ՝ որոշումը կայացվել է Հայաստանի հետ ԵՄ գործընկերության շրջանակներում, հիմնված ընդհանուր արժեքների վրա և ուղղված է Հայաստանում և Հարավային Կովկասում խաղաղության, կայունության և բարգավաճման խթանմանը: Այն նաև նպատակ ունի բարձրացնել Հայաստանի դիմադրողականությունը, արագացնել զինված ուժերի փոխգործունակությունը հետագայում երկրի կողմից միջազգային, այդ թվում՝ ԵՄ-ի կողմից կազմակերպված ռազմական առաքելություններին ու գործողություններին հնարավոր մասնակցության դեպքում: ԵՄ արտաքին եւ անվտանգության հարցերով բարձր ներկայացուցիչ Ժոզեպ Բորելն ընդգծել է, որ ԵՄ-ն փոխադարձ շահագրգռվածություն ունի ավելի ընդլայնելու իր երկխոսությունը արտաքին և անվտանգության քաղաքականության վերաբերյալ՝ նաև դիտարկելով Հայաստանի ապագա մասնակցությունը ԵՄ-ի գլխավորած առաքելություններին և գործողություններին: «ԵՄ-ն հավատարիմ է Հայաստանի հետ համապարփակ քաղաքական և տնտեսական գործընկերությունը ընդլայնելուն՝ հիմնված ԵՄ-Հայաստան Համապարփակ և ընդլայնված գործընկերության համաձայնագրի վրա և էլ ավելի ամրապնդելու հարաբերությունները բոլոր հարթություններում: Սա ներառում է արտաքին և անվտանգության քաղաքականության ոլորտում երկխոսության և համագործակցության ակտիվացում, որը ներառում է նաև անվտանգության և պաշտպանության ընդհանուր քաղաքականությունը»,- նշված է ԵՄ խորհրդի տարածած մամլո հաղորդագրությունում։