Ինդոնեզիան դիտարկում է Ռուսաստանից նավթ ներկրելու հնարավորությունը. Financial Times Ինդոնեզիայի նախագահ Ջոկո Վիդոդոն Financial Times-ին տված հարցազրույցում ասել է, որ դիտարկում է Ռուսաստանից նավթի ներկրումը երկրում էներգակիրների գների զսպման մասով: «Մենք միշտ դիտարկում ենք բոլոր տարբերակները։ Կառավարությունը պարտավոր է տարբեր աղբյուրներ գտնել իր ժողովրդի էներգետիկ կարիքները հոգալու համար», - մեջբերում է ՏԱՍՍ-ը նրա խոսքերը: Հարցին, թե իշխանությունները դիտարկում են Ռուսաստանից նավթ ներկրելու հնարավորությունը, Վիդոդոն դրական է պատասխանել։ Ավելի վաղ South China Morning Post-ը (SCMP) հայտնել էր, որ Ինդոնեզիան կարող է չհամաձայնել ռուսական նավթի գինը սահմանափակելու ԱՄՆ-ի առաջարկին, քանի որ դա կնշանակի պատժամիջոցների սահմանում Ռուսաստանի դեմ։