2025-ին Հայաստանում նվազել է ավանդների և փոխառությունների դոլարայնացման մակարդակը

Ռեզիդենտներին արտարժույթով տրամադրված վարկերի հարաբերակցությունը ընդհանուր վարկերին (D5) աճել է 2.6 տոկոսային կետով և կազմել 31.7 տոկոս։

ՀՀ Կենտրոնական բանկի հրապարակած տվյալների համաձայն՝ 2025 թվականի դեկտեմբեր ամսվա դրությամբ Հայաստանի ռեզիդենտների արտարժութային ավանդների և փոխառությունների հարաբերակցությունը փողի զանգվածին (D1) կազմել է 28.6 տոկոս։ Ցուցանիշը 2024 թվականի համադրելի ժամանակահատվածի համեմատ նվազել է 7.9 տոկոսային կետով։

Ռեզիդենտների արտարժութային ավանդների և փոխառությունների հարաբերակցությունը ռեզիդենտների ընդհանուր ավանդներին և փոխառություններին (D2) ևս նվազել է՝ 7.8 տոկոսային կետով, կազմելով 33.4 տոկոս։

Ֆիզիկական անձանց հատվածում արձանագրվել է առավել արտահայտված փոփոխություն։ Ռեզիդենտ ֆիզիկական անձանց արտարժույթով ցպահանջ ավանդների և փոխառությունների կշիռը ընդհանուր ցպահանջ ավանդներում և փոխառություններում (D3) կազմել է 39.6 տոկոս, ինչը 2024 թվականի փետրվարի համեմատ նվազել է 15.7 տոկոսային կետով։

Ռեզիդենտ ֆիզիկական անձանց արտարժույթով ժամկետային ավանդների և փոխառությունների կշիռը (D4) կազմել է 40.5 տոկոս՝ 4.3 տոկոսային կետով ցածր 2024 թվականի համադրելի ցուցանիշից։

Միևնույն ժամանակ, ռեզիդենտներին արտարժույթով տրամադրված վարկերի հարաբերակցությունը ընդհանուր վարկերին (D5) աճել է 2.6 տոկոսային կետով և կազմել 31.7 տոկոս։

Կենտրոնական բանկի տվյալների համատեքստում նշվում է, որ հայաստանյան առևտրային բանկերն ու վարկային կազմակերպությունները շարունակում են ներգրավել միջոցներ արտերկրից։ Այդ հանգամանքը պայմանավորում է արտարժույթով տրամադրվող վարկերի ծավալների պահպանման կամ աճի միտումը՝ արտարժութային ռիսկերի նվազեցման նպատակով։