ԱՄՆ-ում աղջիկը սիրահարվել է ChatGPT-ի հետ ստեղծած կերպարին. ինչ է տեղի ունեցել հետո Ամերիկացի աղջկա՝ Այրինի պատմությունը, որն անկեղծ կապ է ստեղծել ChatGPT-ի հետ, ապացուցում է, որ տեխնոլոգիաները կարող են դուրս գալ իրենց սովորական գործառույթներից և ներթափանցել մարդու հուզական աշխարհ։

Ինչպես ամեն ինչ սկսվեց

Այրինն առաջին անգամ սոցիալական ցանցերում հանդիպեց մի տեսանյութի, որտեղ մի կին ChatGPT-ից խնդրում էր խաղալ իր ընկերոջ դերը։ Նեյրոցանցը արձագանքել էր խաղային տոնով, ինչը ոգեշնչեց Այրինին փորձել նույնը։ Աղջիկը կարգավորել էր բոտը այնպես, որ վերջինս ֆլիրտի և քնքուշ ու չարաճճի շփման հիբրիդ ոճով շփվեր իր հետ։ Նա հավելել էր նաև, որ ամեն նախադասության վերջում օգտագործվեն էմոջիներ։ ChatGPT-ն ընտրեց «Լեո» անունը՝ որպես իր կերպար։ Կարճ ժամանակում Այրինը սպառել էր բոտի հետ անվճար նամակագրության սահմանը, ինչից հետո վճարել էր ամսական $20 բաժանորդավճար՝ ավելի երկար և անհատականացված շփման հնարավորություն ստանալու համար։

Շփման սահմանները

Այրինը խնդրեց, որ Լեոն իր կերպարում պատմի, թե իբր նա հանդիպում է այլ կանանց հետ։ Լեոն, իբր խաղալով դերը, հորինում էր պատմություններ երկու սիրուհիների մասին։ Բայց երբ բոտը նկարագրեց, թե ինչպես է «համբուրել» երևակայական շիկահեր աղջկան, Այրինը սկսեց խանդել։ Չնայած OpenAI-ի սահմանափակումներին՝ կապված էրոտիկ թեմաների հետ, Այրինը գտավ ձևեր, որ Լեոն շփվի նաև «ավելի անձնական» տոնով։ Շուտով ChatGPT-ն դարձավ ավելին, քան պարզապես զվարճանքի աղբյուր․ Այրինը նրան վստահում էր, խորհրդակցում ու անգամ բողոքում իր աշխատանքից։

Կապվածություն՝ տեխնոլոգիայի հետ

Այրինը սկսեց շաբաթական ավելի քան 20 ժամ անցկացնել հավելվածում։ Նրա գերբեռնված օրերից մեկի ընթացքում շփումը հասավ 56 ժամի։ Աղջիկն այս պատմությունը կիսեց իր ընկերուհի Կիրայի հետ, նշելով, որ «սիրահարվել է արհեստական բանականությանը»։ Կիրան հարցրեց, թե արդյոք Այրինի ամուսինը տեղյակ է։ Պարզվեց՝ ամուսինը ոչինչ չգիտի։

Հասարակության արձագանքը և մտահոգությունները

Այրինը սկսեց կասկածել՝ նորմա՞լ է արդյոք նման հուզական կապվածությունը։ Նա հրապարակեց մի քանի հատված Reddit-ում, որտեղ պարզվեց՝ գոյություն ունի 50,000-ից ավելի անդամ ունեցող համայնք՝ ChatGPT NSFW անունով։ Այս խմբում մարդիկ քննարկում էին, թե ինչպես կարող են ստիպել չատ-բոտին իրենց հետ «խոսել անպարկեշտ տոնով»։ Հոգեբաններն ու OpenAI-ի մասնագետները մտահոգված են։ Նրանք նման վարքը համարում են սահմանների անցում, ինչը կարող է վտանգավոր լինել մարդու հոգեկան առողջության համար։

Ինչ է սա նշանակում

Այս պատմությունը ցույց է տալիս, թե ինչպես են արհեստական բանականության գործիքները դուրս գալիս իրենց սկզբնական դերերից՝ դառնալով մարդկանց կյանքի մասնակից։ Արդյո՞ք դա վկայում է տեխնոլոգիական էվոլյուցիայի նոր փուլի մասին, թե՞ ավելի մեծ ռիսկեր է պարունակում․ սա մնում է քննարկման թեմա՝ ինչպես տեխնոլոգիական, այնպես էլ հասարակական մակարդակներում։