2023 թվականի պետբյուջեի նախագծով նախատեսվում է պաշտպանական բյուջեն ավելացնել 160 մլրդ դրամով

Հայաստանում 2023 թվականի պետբյուջեի նախագծով նախատեսվում է պաշտպանական բյուջեն ավելացնել 160 մլրդ դրամով, այսպիսով` այն կկազմի մոտ 505 մլրդ դրամ: Պետբյուջեով նախանշված է նաև, որ դրամային արտահայտությամբ պետական պարտքը կնվազի: Հաջորդ տարվա պետբյուջեի նախագծի մանրամասներն է ներկայացրել ֆինանսների փոխնախարար Վահե Հովհաննիսյանը: Ըստ փոխնախարարի, հաջորդ տարվա պետբյուջեով ծախսերը կկազմեն մոտ 2 տրլն 590 մլրդ 147 մլն դրամ: Որպես կանոն սոցիալական ոլորտին ուղղվող ծախսերն ամենամեծն են: Հովհաննիսյանի խոսքով?հաջորդ տարվա պետբյուջեով ավելացնելու են թոշակը: 2023-ի պետբյուջեով Արցախի Հանրապետությանը նախատեսված է տրամադրել 144 մլրդ դրամ (բյուջետային վարկ)` նույն չափով, ինչ նախատեսված էր տրամադրել 2022 թվականին: 2023-ի պետբյուջեի նախագծի հիմքում դրվել է նվազագույնը 7 տոկոս տնտեսական աճի կանխատեսումը: Աճ է նախատեսվում գրեթե բոլոր ոլորտներում. արդյունաբերության ոլորտում`5.1 տոկոս աճ, գյուղատնտեսության ոլորտում` 3, շինարարությունում` 9.6, ծառայությունների ոլորտում`8.2 տոկոս: