Ինչպես է ԱԲ-ն փոխում լեզվի դասավանդումը և կրթական միջավայրը Հայաստանում
Համագործակցելով Հայաստանի Ամերիկյան Համալսարանի Կիրառական լեզվաբանության հետազոտությունների կենտրոնի և TEFL-ի հետ՝ մենք անցկացրինք կրթական միջավայրում արհեստական բանականության (ԱԲ) կիրառման թեմայով երկու դինամիկ աշխատարան․  - «Արհեստական բանականությունը լեզվական կրթության մեջ. գործիքներ և ռազմավարություններ բուհական դասավանդման համար» - «Արհեստական բանականությունը կրթության մեջ. գործնական կիրառություններ 21-րդ դարի սովորողներին ներգրավելու համար»։
ԱՄՆ պետքարտուղարության անգլերենի մասնագետ, Արիզոնայի պետական համալսարանի գիտաշխատող Վինսենթ Լաութերի վարած այս աշխատարաններին մասնակցեցին միջին/ավագ դպրոցի ուսուցիչներ և Երևանի 12 առաջատար համալսարանների դասախոսներ։ Դասախոսներն ուսումնասիրեցին արհեստական բանականության առաջադեմ գործիքներն ու բարձրագույն կրթության ոլորտում կիրառվող ռազմավարությունները՝ կարևորելով օգտագործման էթիկական նորմերը, ինչպես նաև արդյունավետ հուշումների ձևակերպման, գրավոր/բանավոր խոսքի, կարդալու/լսելու ունակությունների զարգացման նորարարական մեթոդները։
Միջին և ավագ դպրոցների ուսուցիչները ծանոթացան արհեստական բանականության գործիքների կիրառման սկզբունքներին՝ ըստ աշակերտների տարիքային խմբերի, ուսումնասիրեցին ԱԲ-ի օգնությամբ ձևավորվող առաջադրանքները՝ կարևորելով ստեղծարարության, քննադատական մտածողության և ակադեմիական ներառականության խթանման հարցերը դասապրոցեսում։ Երկու աշխատարաններն էլ ընդգծեցին, թե ինչպես կարելի է ԱԲ-ի միջոցով զարգացնել 21-րդ դարի հիմնարար հմտությունները՝ քննադատական մտածողություն, հաղորդակցություն, համագործակցություն և ստեղծարարություն։
Բաժանորդագրվեք մեր Տելեգրամյան ալիքին՝ բիզնես ոլորտի ամենաթարմ և կարևոր նորություններին առաջինը ծանոթանալու համար: