Որ չվերթներն են հետաձգվել Երևանից՝ Իրան-Իսրայել հակամարտության պատճառով

Թել Ավիվ-Երևան-Թել Ավիվ չվերթը չեղարկվել է

Իսրայելի կողմից Իրանին հասցված ավիահարվածներից հետո ստեղծված լարվածության ֆոնին չեղարկվել է «FlyOne» ավիաընկերության Թել Ավիվ-Երևան-Թել Ավիվ չվերթը։ Սա տեղի է ունեցել այն բանից հետո, երբ տարածաշրջանում անվտանգությունը զգալիորեն սրվել է։

ԱՄԷ-ն նույնպես կատարել է փոփոխություններ չվերթներում

Իրան-Իսրայել հակամարտության սրման պատճառով Միացյալ Արաբական Էմիրությունները (ԱՄԷ) ևս մի շարք քայլեր են ձեռնարկել օդային երթևեկության անվտանգության ապահովման նպատակով։ Մասնավորապես՝ չեղարկվել, հետաձգվել կամ փոփոխվել են մի շարք չվերթերի երթուղիներ։

«Զվարթնոց» միջազգային օդանավակայանի կայքի տվյալներով՝ չեղարկվել են հետևյալ չվերթները․

• «Fly Dubai» ավիաընկերության Դուբայ-Երևան-Դուբայ չվերթը,

• «Wizz Air» ավիաընկերության Աբու Դաբի-Երևան-Աբու Դաբի չվերթը։

Բացի այդ, «Armenia Airways»-ի Թեհրան-Երևան-Թեհրան չվերթը ներկայումս հետաձգված է։

ՀՀ քաղաքացիական ավիացիայի կոմիտեի մեկնաբանությունը

ՀՀ քաղաքացիական ավիացիայի կոմիտեն հաստատել է, որ այս պահին անժամկետ չեղարկված են Երևանից դեպի Իրան, Իսրայել և Արաբական Միացյալ Էմիրություններ չվերթները։

Նրանց խոսքով՝ հունիսի 13-ի գիշերը՝ 04։30-ից սկսած, Իրանը փակել է իր օդային տարածքը, ինչի հետևանքով որոշ չվերթների ինքնաթիռներ ստիպված են եղել վայրէջք կատարել Երևանի «Զվարթնոց» օդանավակայանում՝ որպես պահուստային տարբերակ։ Մասնավորապես՝ Բելգրադ-Դուբայ, Մինվոդի-Դուբայ և Կազան-Շարժա չվերթերն իրականացնող օդանավերը։

Իսրայելի հարձակման հետևանքները

Հիշեցնենք, որ հունիսի 13-ի գիշերը Իսրայելը մի շարք հարվածներ է հասցրել Իրանի տարբեր թիրախներին։ Հարձակման հետևանքով սպանվել են Իրանի բարձրաստիճան զինվորականներ և միջուկային ոլորտի գիտնականներ։ Իրանի գերագույն առաջնորդ այաթոլլա Ալի Խամենեին իր ուղերձում Իսրայելի գործողությունները հանցագործություն է որակել՝ հայտնելով, որ Իսրայելին «դառը և սարսափելի ճակատագիր» է սպասվում։