Կայացավ ՀԲԸՄ «Նաիրի» ճամբարի ամանորյա միջոցառումը

Ամանորյա, հեքիաթային ու հագեցած օր ունեցան Հայկական բարեգործական ընդհանուր միության «Նաիրի» անվճար ճամբարի մասնակից շուրջ 550 երեխաները։ Նրանք 44-օրյա պատերազմի մասնակիցների, զոհերի, գերի ընկած, բռնի տեղահանված անձանց երեխաները, քույրերն ու եղբայրներն են, ովքեր արդեն չորս տարի մասնակցում են շարունակաբար կազմակերպվող «Նաիրի» ճամբարին։ Հավատարմագրված մասնագետների կողմից իրականացվող զվարճալի միջոցառումների ու վերականգնողական դասընթացների միջոցով «Նաիրի» ճամբարը խթանում է վերջիններիս հոգեբանական ապաքինման գործընթացը: 2021-2024 թվականներին 7-13 տարեկան ավելի քան 1200 երեխաներ են մասնակցել ամառային ճամբարներին, այդ թվում՝ 2023 թ․ օգոստոսին՝ Արցախի շրջափակման օրերին, կազմակերպված կարճաժամկետ ծրագրին։ https://youtu.be/njGNAAJ8SeU 2024 թվականին կազմակերպվել է նաև եռօրյա ընտաբնեկան ճամբար, որին հյուրընկալվել նաև երեխաների մայրիկները, ստացել հոգեբանական աջակցություն և յուրօրինակ հանգիստ անցկացնելու հնարավորություն։ Կազմակերպիչները փաստում են՝ Արցախից բռնի տեղահանված ու Հայաստանում ապաստանած ընտանիքներին աջակցելու անհրաժեշտությունն անհամեմատ աճել է։ Արդեն որոշված է՝ 2025 թվականին ծրագիրն ընդլայնվելու է։ Ամանորյա միջոցառումը իսկական տոն դարձավ երեխաների համար։ Երաժշտական, զարմանահրաշ օրը լի էր խաղերով, աճպարարական հնարքներով և շատ նվերներով։ Նրանց այցելեց Ամանորի ամենասպասված հյուրը՝ Ձմեռ պապը, ով իր բարեմաղթանկներով ու նվերներով մեծ ուրախություն, ամանորյա հրաշք պարգևեց երեխաներին։