Ո՞ր դեպքում անձը տուն կառուցելիս կազատվի եկամտահարկ վճարելուց

Հայաստանի այն քաղաքացիները, որոնք անհատական բնակելի տուն կառուցելուց հետո երկու տարվա ընթացքում կցանկանան այն վաճառել, պետք է վճարեին 20 տոկոս եկամտային հարկ: Ազգային ժողովում ներկայացված նախագծով առաջարկվում է հանել օրենքում գործող այդ դրույթը, քանի որ հեղինակները նշում են, որ բոլոր բնակավայրերում կան հազարավոր անհատական բնակելի տներ, որոնք մարդիկ կառուցել և ապրում են, սակայն չկա ավարտական ակտ, և եթե քաղաքացին այսօր որոշի ունենալ այդ ակտը, վաճառել տունը, ստիպված է լինելու վճարել 20 տոկոս եկամտային հարկ: Նախաձեռնությամբ բոլոր այդ դեպքերում, երբ քաղաքացին կառուցած տունը ցանկանում է վաճառել ու տունը կիսակառույց է կամ չունի ավարտական ակտ, կազատվի այդ եկամտային հարկը վճարելու պարտավորությունից: Նախկինում դրույթը ներառվել է` բացառելու բիզնեսով զբաղվող անձի կողմից եկամտային հարկ վճարելուց խուսափելու դեպքը: Սակայն ՊԵԿ-ն ունի այդ վարչարարությունն իրականացնելու համապատասխան գործիքակազմ: