Դաշնային պահուստային համակարգը մարտին կայանալիք նիստին հավանաբար անփոփոխ կթողնի վերաֆինանսավորման տոկոսադրույքը՝ 4.25-4.5%-ի միջակայքում։ Չնայած գնաճի տեմպի արագացման սպասումներին՝ աշխատաշուկայի բարձր ցուցանիշները թույլ կտան տոկոսադրույքներն անփոփոխ թողնել. փետրվարին երկրում ավելացել է 151,000 աշխատատեղ, ինչը բավականին բարձր է միջինում ամսական 80,000-100,000 նոր աշխատատեղերից։ Չինաստանում սպառողական գների ինդեքսը փետրվարին տարեկան կտրվածքով նվազել է 0.7%-ով՝ գրանցելով նախորդ տարվա հունվարից ի վեր ամենաարագ անկումը։ Սպառողական գների անկումը պայմանավորված է արտադրական գների գնանկմամբ և տնային տնտեսությունների ծախսերի կրճատմամբ։ ԱՄՆ-ում գործազրկության նպաստի առաջնային դիմումների թիվը մարտի 1-ին ավարտվող շաբաթվա ընթացքում նվազել է 21,000-ով և կազմել 221,000։ Չնայած աշխատաշուկայի կայունությանը՝ առաջիկայում սպասվում է որոշակի տատանողականություն, ինչը պայմանավորված է աշխատանքից կրճատումների աճով և «առևտրային պատերազմների» հետ կապված մտահոգություններով։ Եվրոպական կենտրոնական բանկը վերջին ինն ամիսների ընթացքում արդեն վեցերորդ անգամ կրճատեց վերաֆինանսավորման տոկոսադրույքը 0.25 տոկոսային կետով և սահմանեց 2.5%՝ շարունակելով մեղմացման քաղաքականությունը՝ չնայած սպասվող տնտեսական ցնցումներին և ռազմական ծախսերի մեծացման ծրագրերին։ Եվրագոտու երկրներում փետրվարին գնաճը տարեկան կտրվածքով կազմել է 2.4%՝ հունվարին գրանցված 2.5%-ից հետո։ Փորձագետների կանխատեսմամբ գնաճի տեմպի անկումը Եվրոպական կենտրոնական բանկին թույլ կտա այս տարի տոկոսադրույքների ևս 2 կամ 3 կրճատում իրականացնել՝ տարեվերջին այն հասցնելով թիրախային 2%-ին կամ 1.75%-ի։ finarm.am   Բաժանորդագրվեք մեր Տելեգրամյան ալիքին՝ բիզնես ոլորտի ամենաթարմ և կարևոր նորություններին առաջինը ծանոթանալու համար: