Ռուսաստանում միգրանտներին կարող են պարտադրել օգտագործել Max մեսենջերը

Ռուսաստանի Պետդումայի «Նոր մարդիկ» խմբակցության պատգամավորներ Վլադիսլավ Դավանկովը, Գեորգի Արապովը և Ամիր Խամիտովը նամակ են հղել ներքին գործերի նախարար Վլադիմիր Կոլոկոլցևին՝ միգրանտներին Max մեսենջերն օգտագործել և տեղադրել պարտադրելու առաջարկով, հաղորդում է TASS-ը։

Պատգամավորները նշել են, որ միգրանտներն ակտիվորեն օգտվում են արտասահմանյան մեսենջերներից և հավելվածներից, որոնք միշտ չէ, որ համապատասխանում են անվտանգության պահանջներին և չեն ապահովում տվյալների պաշտպանության պատշաճ մակարդակ։

Պատգամավորների կարծիքով՝ սա լրացուցիչ ռիսկեր է ստեղծում միգրանտներին խարդախության սխեմաներում և հանցավոր գործողություններում ներգրավելու համար, ինչպես նաև նվազեցնում է միգրացիոն միջավայրում տեղեկատվական փոխգործակցությունը վերահսկելու պետության հնարավորությունները։

Պատգամավորների խոսքով՝ նոր մոտեցումը թույլ կտա ինտեգրել տվյալ մեսենջերը պետական ծառայությունների հետ, բարձրացնել միգրացիոն իրավիճակի նկատմամբ վերահսկողության արդյունավետությունը, ստեղծել միգրանտների՝ պետական մարմինների և գործատուների հետ փոխգործակցության միասնական անվտանգ թվային ալիք, ինչպես նաև նվազեցնել օտարերկրյա մեսենջերների՝ անօրինական նպատակներով օգտագործման հավանականությունը։