Պարենի և գյուղատնտեսության կազմակերպությունը (ՊԳԿ) վերանայել է 2024 թվականի համաշխարհային հացահատիկային ապրանքների արտադրության կանխատեսումները՝ սահմանելով այն 2 851 միլիոն տոննա, որը մոտավորապես համահավասար է 2023 թվականի ցուցանիշին:
Ուրբաթ հրապարակված հացահատիկային ապրանքների առաջարկի և պահանջարկի հաշվետվությունում նշված է, որ փոփոխությունները պայմանավորված են կերային հատիկեղենի, մասնավորապես՝ եգիպտացորենի բերքահավաքի ակնկալիքների նվազումով՝ հիմնականում տաք և չոր եղանակային պայմանների հետևանքով Եվրոպական միությունում, Մեքսիկայում և Ուկրաինայում:
Միևնույն ժամանակ, ՊԳԿ-ն բարձրացրել է 2024 թվականին ցորենի և բրնձի համաշխարհային արտադրության կանխատեսումները, որոնք, համաձայն հաշվարկների, կհասնեն ռեկորդային մակարդակի՝ 537 միլիոն տոննայի:
Հացահատիկային մշակաբույսերի համաշխարհային սպառումը կանխատեսվում է 2 852 միլիոն տոննա, ինչը 0.2 տոկոսով գերազանցում է 2023-2024 թվականների մակարդակը: Բրնձի սպառումը, ըստ կանխատեսումների, կհասնի ռեկորդային բարձունքների՝ պայմանավորված սննդամթերքի սպառման աճով:
2025 թվականի վերջում հացահատիկային ապրանքների համաշխարհային պաշարները, կանխատեսումների համաձայն, կաճեն 1.2 տոկոսով՝ գրեթե անփոփոխ պահելով պաշարների ու սպառման համադրության ցուցանիշը՝ 30.7 տոկոս:
Հացահատիկային ապրանքների միջազգային առևտուրը կանխատեսվում է 485.6 միլիոն տոննա՝ 2023-2024 թվականների ցուցանիշից 3.3 տոկոսով ցածր, որտեղ հիմնական նվազումը պայմանավորված է կերային հատիկեղենի վաճառքի ցածր ծավալներով:
JavaScript seems to be disabled in your browser. You must have JavaScript enabled in your browser to utilize the functionality of this website.
