Հայաստանի Հաշվապահների Ասոցիացիայի կողմից Հայաստանի պետական տնտեսագիտական համալսարանի և Համալսարանի ֆինանսատնտեսագիտական քոլեջի ուսանողներին հանձնվել են անվանական կրթաթոշակներ: Նպատակն է երիտասարդ սերնդի շրջանում ուսման նկատմամբ հետաքրքրության խթանումը, կրթության մակարդակի բարձրացումն ու բարելավումը։ Կրթաթոշակի տրամադրման վերաբերյալ պայմանավորվածությունը ձեռք է բերվել Հայաստանի հաշվապահների ասոցիացիայի և Հայաստանի պետական տնտեսագիտական համալսարանի միջև ստորագրված համագործակցության հուշագրի շրջանակում։
Հուշագրով կողմերը պայմանավորվածություն էին ձեռք բերել նաև համագործակցության մի շարք ուղղությունների վերաբերյալ՝ լսարանի նորոգում և կահավորում, վարպետաց դասերի անցկացում և ուսումնական պրակտիկաների կազմակերպում Ասոցիացիայում և Ասոցիացիայի անդամ հանդիսացող հաշվապահական հաշվառման գրասենյակներում։
Կրթաթոշակի շահառու ճանաչվելու համար մրցույթին մասնակցել են Հայաստանի պետական տնտեսագիտական համալսարանի և Հայաստանի պետական տնտեսագիտական համալսարանի ֆինանսատնտեսագիտական քոլեջի 2-ից 4-րդ կուրսի ուսանողները։ Կրթաթոշակի թվով 8 շահառուներ ընտրվել են հանձնաժողովի կողմից՝ յուրաքանչյուր հաստատությունից համապատասխանաբար 4 ուսանող։ Համալսարանի 4 ընտրված ուսանողները կստանան ամսական 30.000 ՀՀ դրամ կրթաթոշակ, իսկ Քոլեջի 4 ընտրված ուսանողները՝ ամսական 20.000 ՀՀ դրամ կրթաթոշակ: Ընտրված ուսանողները հնարավորություն են ստանում նաև անվճար հիմունքներով մասնակցել Ասոցիացիայի կողմից կազմակերպվող «Metasoft հաշվապահական և հարկային հաշվառման ծրագրի ուսուցում» դասընթացին։
Մեկնաբանություն