Եվրահանձնաժողովը 6.2 միլիարդ եվրո է հատկացրել ԵՄ երկրներում տրանսպորտային ենթակառուցվածքների զարգացման 107 նախագծի համար: Այս մասին ասվում է Եվրահանձնաժողովի մամուլի ծառայության տարածած հաղորդագրության մեջ,- գրում է b24.am-ը։
«Եվրահանձնաժողովն ընտրել է 107 տրանսպորտային ենթակառուցվածքային նախագիծ՝ 6.2 միլիարդ եվրոյի ֆինանսավորմամբ: Ներդրումների ավելի քան 80%-ը կաջակցի նախագծերին, որոնք կապահովեն տրանսեվրոպական ներքին ջրային և ծովային երկաթուղիների ավելի մաքուր և արդյունավետ ցանց: Այս նախագծերը նաև զգալիորեն կընդլայնեն «համերաշխության գծերը» (անդրսահմանային տրանսպորտային գծեր) Ուկրաինայի հետ, ինչը պետք է դյուրացնի ուկրաինական ներմուծումն ու արտահանումը»,- ասվում է հայտարարության մեջ։
Եվրահանձնաժողովը նշում է, որ մեկ այլ ներդրումային առաջնահերթություն է Անդրբալթյան երկաթուղին, որը կմիացնի բալթյան երեք երկրները ԵՄ մնացած երկրների հետ։
Անդրբալթյան երկաթուղու նախագիծը քննարկվում է ավելի քան 15 տարի։ Սկզբում այն մտահղացվել էր որպես Ռուսաստանի հետ առևտրի տարանցիկ ճանապարհ։ Ներկայում, երբ խզված են Ռուսաստանի հետ տնտեսական հարաբերությունները, մերձբալթյան երկրները տրանսպորտային փակուղի են դարձել արտաքին առևտրի առումով: Այսպիսով, այս ճանապարհն այլևս ռազմավարական նշանակություն ունի:
Մեկնաբանություն