Հայաստանում նավթամթերքի շուկայում առաջին ընկերության բացման կարմիր ժապավենը էկոնոմիկայի նախարարն է կտրում, որովհետեւ կարեւոր է համարում երկրում քիմիական արդյունաբերության ոլորտի զարգացումը:
Շարժիչային ու արդյունաբերական յուղերի եւ քսայուղերի գործարան բացելու գործընթացը բավական երկար է տեւել: Տնօրենի խոսքով` գաղափարը ծնվել է 2019-ին, սակայն համավարկն ու պատերազմն աշխատանքը հետաձգեցին:Մեկ տարի առաջ Գայանե Գրիգորյանը դիմեց էկոնոմիկայի նախարարություն` Ալյանս ազատ տնտեսական գոտում գրանցվելու համար: Այդ օրվանից շաբաթը յոթ օր ու 24 ժամ աշխատել են: Ընթացքը բարդ է եղել, բայց հիմա հանգիստ շունչ են քաշում` գաղափարն իրագործված է: Ֆայն օիլը շարժիչային ու արդյունաբերական յուղեր, քսուկներ արտադրելուց բացի բանակի համար էլ արտադրանք կտա:Նորագույն տեխնոլոգիաներով աշխատող գործարանում յուղն արտադրվում է սառեցման եղանակով: Արտադրական ամբողջ պրոցեսն էկոլոգիապես մաքուր է եւ անվտանգ:
Գայանե Գրիգորյանը Մանթաշյանց գործարարների միության անդամ է: Գործարանի բացմանը ներկա էին նաեւ միության անդամները: Շրջեցին, ծանոթացան արտադրական պրոցեսին:
Էկոնոմիկայի նախարարը կարեւոր է համարում գործարար միությունների դերը բիզնեսի զարգացման գործում, նաեւ ոլորտի խնդիրները վեր հանելու ու պետական կառույցների հետ դրանք քննարկելու համար:
Մեկնաբանություն