Երբ մարդիկ գեներատիվ արհեստական բանականությունը օգտագործում են, նրանք սովորաբար առաջնորդվում են իրենց մտածողության այն մոդելով, որը սահմանում է, թե ինչ պետք է կամ ինչ կարող է տեղի ունենալ հաջորդիվ։ Օրինակ՝ Google-ում որոնելիս մարդիկ հարց են տալիս, փնտրում են «մոտակա լավագույն սուշի բարը» կամ նշում են կոնկրետ չափանիշներ, ինչպես օրինակ՝ «միջին մակարդակի հեծանվորդների համար լավագույն լեռնային հեծանիվը»։
Այս մոտեցումը հաճախ կիրառվում է նաև գեներատիվ ԱԲ-ի հարցումների ժամանակ։ Արդյունքները հիմնվում են մտածողության, հետազոտության և որոշումների ընդունման գծային տրամաբանության վրա՝ ըստ մեր հայտնի աշխարհի։
Այս հոդվածում կներկայացվի, թե ինչպես գեներատիվ ԱԲ-ն կարող է փոխել ոչ միայն աշխատանքի ընթացքը, այլև ստեղծել նոր արժեքներ՝ պահանջելով «մտքի փոփոխություն» (mindshift):
ԱԲ-ն՝ որպես գործիք և գործընկեր
Գեներատիվ ԱԲ-ի ներկայիս մոդելները հիմնականում հիմնվում են բնական լեզվի մշակման (NLP) վրա՝ հասկանալու հարցումներն ու ապահովելու համապատասխան պատասխանները։ Այս մեխանիզմը շատ նման է մեր ուղեղի՝ նախշերի ճանաչման և արդյունավետության որոնման տրամաբանությանը։ Բայց եթե շարունակենք օգտագործել ԱԲ-ն նույն եղանակով, մենք պարզապես ստեղծելու ենք աշխատանքի նոր «ստատուս քվո»։
Միտքդ վարժեցրու՝ մտածելու ավելի լայն շրջանակներում՝ ԱԲ-ի հետ համագործակցելով, այլ ոչ թե պարզապես այն որպես գործիք օգտագործելով։
ԱԲ-ն՝ աշխատանքի նոր հնարավորությունների բացահայտման համար
Գեներատիվ ԱԲ-ն ոչ միայն կատարելագործում է առկա աշխատանքը, այլև հնարավորություն է տալիս ստեղծել այնպիսի արդյունքներ, որոնք առանց ԱԲ-ի անհնար կլինեին։
Օրինակ՝ եթե դու պատրաստվում ես պատրաստել ընթրիք, բայց չունես անհրաժեշտ բաղադրիչները, կարող ես ԱԲ-ին ներկայացնել այն, ինչ ունես, և խնդրել գաղափարներ։ «Ես ունեմ երկու կարմիր լոլիկ, հավի ֆիլե, ձիթապտղի յուղ, աղ և սպիտակ սոխ։ Ի՞նչ կերակուրներ կարող եմ պատրաստել այս բաղադրիչներով» հարցի պատասխանով կարելի է ստանալ բազմաթիվ առաջարկներ՝ լոլիկով հավի աղցան, թավայի մեջ պատրաստվող հավ և այլն։
Սա ցույց է տալիս, թե ինչպես կարելի է ԱԲ-ի հետ համագործակցելով նոր ուղիներ գտնել՝ չբավարարվելով պարզ, գծային լուծումներով։
12 վարժություն՝ միտքդ գեներատիվ ԱԲ-ի հետ ստեղծագործելու համար
1. Ստեղծագործ հարցման օրական պրակտիկա. Օրինակ՝ «Ի՞նչ նոր միտումներ կամ հնարավորություններ կան իմ ոլորտում, որոնք չեմ նկատում»։
2. Հարցերի ձևակերպում «Ինչ կլինի, եթե» ոճով. Օրինակ՝ «Ինչ կլինի, եթե արտադրողականությանը մոտենամ ոչ ավանդական ձևով»։
3. Միտումնավոր անորոշություն հարցերում. «Ի՞նչ կարող եմ բաց թողնել իմ մոտեցման մեջ X խնդիրին»։
4. Ուղղվածություն՝ ուսումնասիրության, այլ ոչ լուծման վրա. «Ինչպե՞ս կփոխվի աշխատանքային մշակույթը, եթե ԱԲ-ն դառնա գործադիր խորհրդի անդամ»։
5. Հարցերի շղթայական զարգացում. Օրինակ՝ «Ինչպե՞ս այս գաղափարը կարող է փոխել ընկերության գործունեությունը 5 տարվա ընթացքում»։
6. Մետաֆորիկ և համեմատական մտածողություն. «Պարային ներկայացման տեսանկյունից ինչպես կփոխվի իմ մոտեցումը արտադրողականությանը»։
7. Տարբեր դիտակետեր. «Ինչպե՞ս կմտածեն արվեստագետը, գիտնականը և փիլիսոփան այս մարտահրավերի շուրջ»։
8. Դերային խաղերի օգտագործում. «Ինչպե՞ս Սթիվ Ջոբսը կամ Վոլտ Դիսնեյը կլուծեին այս խնդիրը»։
9. Հնարավորությունների փնտրտուք անհնարին լուծումներում. «Ինչպիսի՞ լուծումներ կարող են վերացնել տվյալ խնդիրը լիովին»։
10. ԱԻ-ի դերը՝ որպես նորարար գործընկեր. «Ինչպե՞ս կդիզայներեր ԱԲ-ն այս ծառայությունը՝ իմ տեսանկյունից»։
11. Ապագայամետ հարցերի շաբաթական նստաշրջան. «Ի՞նչ փոփոխություններ են հնարավոր 10 տարվա ընթացքում իմ ոլորտում»։
12. Հարցումների օրագիր պահել. Փաստագրիր հարցումները, որոնք ստեղծագործական կամ արժեքավոր արդյունքներ են տվել։
***
Գեներատիվ ԱԲ-ն ոչ միայն գործիք է, այլև հնարավորություն՝ վերափոխելու մեր մտածողության ձևերը։ Այն օգնում է գտնել այնպիսի լուծումներ, որոնք միայն մարդկային կամ մեքենայական ինտելեկտը մենակ չեն կարող առաջարկել։
Շարունակական վարժանքը և համարձակ հարցադրումները կօգնեն ձեզ բացահայտել նորարարական լուծումներ և կձևավորեն առաջնորդների այնպիսի մտածողություն, որտեղ «անհնարինը» կդառնա ամենօրյա մարտահրավեր։
Նկարազարդում՝ Բրայան Ռեա
Աղբյուր՝ Harvard business Review
