Հայաստանի եւ Չինաստանի միջեւ ապրանքաշրջանառությունը 2022-ին աճել է 39,4%-ով Պեկինում անցկացվել է Առեւտրատնտեսական հարցերով հայ-չինական համատեղ հանձնաժողովի 11-րդ նիստը, որին մասնակցել են Հայաստանի էկոնոմիկայի նախարար Վահան Քերոբյանը եւ Չինաստանի առեւտրի նախարարի տեղակալ, միջազգային առեւտրային բանակցություններում ներկայացուցչի տեղակալ Լին Ցզին,- գրում է banks.am-ը։ Նիստի ընթացքում քննարկվել են երկու երկրների միջեւ առեւտրատնտեսական հարաբերությունների խորացմանը վերաբերող հարցեր: Մասնավորապես, անդրադարձ է կատարվել առեւտրաշրջանառության ընդլայնմանը, ներդրումների խթանմանը, գյուղատնտեսության, արդյունաբերության, թվային տնտեսության, զբոսաշրջության եւ ավիացիոն ոլորտներում փոխգործակցությանը, միջտարածաշրջանային համագործակցությանը եւ մի շարք այլ հարցերի։ Հայաստանի եւ Չինաստանի միջեւ ապրանքաշրջանառությունը 2022 թ․ կազմել է $1,76 միլիարդ՝ նախորդ տարվա նույն ժամանակահատվածի համեմատ աճելով 39,4%-ով։ Ապրանքաշրջանառությունը 2023 թ․ հունվար-մարտ ամիսներին կազմել է $448,8 միլիոն՝ նախորդ տարվա նույն ժամանակահատվածի համեմատ ավելանալով 43,5%-ով։ Էկոնոմիկայի նախարարությունից հայտնել են, որ Չինաստանը շարունակում է մնալ Հայաստանի երկրորդ խոշոր առեւտրային գործընկերը։