Չինական Xiaomi ընկերությունը նախատեսում է ներկայացնել իր առաջին խելացի ժամացույցը, որը կաշխատի Google-ի Wear OS օպերացիոն համակարգով և փաստացի Apple Watch-ի մրցակիցը կլինի, այս մասին հայտնում է Xiaomiui պորտալը։
Նշվում է, որ M2235W1 կոդային անունով սարքն արդեն ստացել է EEC և TUV PLS սերտիֆիկացում, և հիմա այն հայտնվել է կորեական NRRA կարգավորիչի տվյալների բազայում, ինչը վկայում է ժամացույցի մոտալուտ թողարկման մասին։
Ըստ լուրերի՝ նոր Xiaomi խելացի ժամացույցը կունենա SIM քարտի կամ e-SIM-ի աջակցություն, ինչը թույլ կտա օգտատերերին զանգեր կատարել անմիջապես ժամացույցով՝ առանց սմարթֆոնին միանալու։
Այս պահին սարքի մասին այլ մանրամասներ դեռ չեն հաղորդվում։ Ենթադրվում է, որ ժամացույցը կթողարկվի Xiaomi Watch անվամբ, սակայն սարքի իրական անունը դեռ հայտնի չէ։
Wear OS-ը խելացի ժամացույցների օպերացիոն համակարգ է, որն օգտագործվում է Samsung-ի, Google-ի և այլ խոշոր արտադրողների կողմից: Wear OS-ի առավելություններից է տարբեր հավելվածներ տեղադրելու հնարավորությունը, ինչը հնարավոր չէ տարբեր ֆիթնես թրեքերի դեպքում։
NEWS.am Tech-ն ավելի վաղ տեղեկացրել էր, որ Huawei ընկերությունն արտադրել է Huawei Watch 4 խելացի ժամացույց, որն առաջին անգամ կստանա ոչ ինվազիվ գլյուկոմետր, որի միջոցով հնարավոր կլինի չափել արյան բաղադրության մեջ շաքարի մակարդակը՝ առանց մարդու մաշկը ծակելու։ Խելացի ժամացույցը նաև կստանա շափյուղե ապակի և կունենա արբանյակային կապի աջակցություն։
Մեկնաբանություն