Հայաստանի Պետական եկամուտների կոմիտեն (ՊԵԿ) օրերս անցկացրեց հանդիպում ԱԺ մի խումբ պատգամավորների հետ՝ ընդգրկելով հայաստանյան հանրային հարթակների ակտիվ բլոգերներին և ինֆլյուենսերներին:
Հանդիպման նպատակն էր քննարկել գովազդային ծառայությունների մատուցումից ստացվող եկամուտների հարկման գործընթացը՝ հավասար հարկային վարչարարություն ապահովելու համար:
ՊԵԿ նախագահ Ռուստամ Բադասյանն իր ելույթում հատուկ ընդգծեց կամավոր կարգապահության դերը հարկման համակարգում՝ նշելով, որ հարկերի վճարման գործընթացում ակտիվ մասնակցություն ունենալը միակ արդյունավետ մոտեցումն է, որը կարող է ապահովել այս ոլորտի կայուն աճն ու զարգացումը: Ըստ նրա՝ բլոգերների և ինֆլյուենսերների դերը նշանակալի է հարկային կարգապահության բարձրացման գործում՝ հաշվի առնելով, որ այս ոլորտը ներկայումս ակտիվորեն աճում է:
Հարկային կարգապահության ամրապնդման մեխանիզմները
Այս տարվա հունիս-սեպտեմբեր ամիսներին ՊԵԿ-ը իրացման շրջանառության թերհայտարարարգրման հնարավոր ռիսկերը նվազեցնելու համար 44 ինֆլյուենսերների ուղարկել է 57 ծանուցագիր: Ծանուցագրերում նշված էին չհայտարարագրված գործարքները՝ նպատակ ունենալով նրանց տեղեկացնել հարկային կանոնների պահպանման կարևորության մասին:
Վերլուծական աշխատանքների արդյունքները ցույց են տալիս, որ հարկ վճարողների իրացման շրջանառությունը զգալիորեն աճել է՝ հունիսից հուլիս, օգոստոս և սեպտեմբեր ամիսներին համապատասխանաբար 119%, 41% և 101%-ով։ 2024 թ․ հունվար-սեպտեմբեր ամիսներին իրացման շրջանառությունը 28%-ով աճել է 2023 թ․ նույն ժամանակահատվածի համեմատ՝ հասնելով լրացուցիչ 153․5 միլիոն դրամի:
Նոր ինստիտուտների ներդրում՝ ինքնազբաղված անձանց համար
Հանդիպման ժամանակ քննարկվեցին բիզնեսին մատուցվող ծառայությունների դեպքում փաստաթղթավորման հետ կապված խնդիրները, ինչպես նաև առաջարկվեց նոր ինստիտուտ ներդնել ինքնազբաղված անձանց համար: Սա հնարավորություն կտա ինֆլյուենսերներին հարկերի վճարման գործընթացն իրականացնել ավելի հարմարավետ և պարզեցված մեխանիզմով, ինչը կնպաստի ոլորտի հարկային կարգապահության բարձրացմանը։
Գովազդային շուկայի կայուն աճը և բլոգերների դերը
Հայաստանում համացանցի ոլորտում գովազդային շուկայի կայուն աճը նկատելի է: Այն պահանջում է հարկային օրենսդրության նորամուծություններ՝ ինչպես բիզնեսին մատուցվող ծառայությունների, այնպես էլ կամավոր հարկային կարգապահության առումով: Ինֆլյուենսերների մասնակցությունն այս գործընթացում կարևորվել է, քանի որ նրանց գործունեությունն անմիջականորեն ազդում է հարկային վարչարարության արդյունավետության վրա:
Հանդիպման ընթացքում պայմանավորվածություն է ձեռք բերվել քննարկումները դարձնել շարունակական՝ նպատակ ունենալով խորացնել համագործակցությունը և լուծել ոլորտի մասնակիցների խնդիրները:
Մանրամասն՝ տեսանյութում:
