Այսօր կառավարության նիստում քննարկվել է «Հայաստանի Հանրապետության և Եվրասիական զարգացման բանկի միջև Կայունացման և զարգացման եվրասիական հիմնադրամի միջոցներից «Քաջարանի թունելի շինարարություն» ծրագրի ֆինանսավորման համար ներդրումային վարկի տրամադրման մասին» համաձայնագրի ստորագրումը։
ՀՀ տարածքային կառավարման և ենթակառուցվածքների նախարար Գնել Սանոսյանը հայտնել է, որ ծրագրով նախատեսվում է իրականացնել շուրջ 7 կմ երկարություն ունեցող թունելի և գոյություն ունեցող Մ2 ճանապարհից թունելին մոտեցումների 4 կմ կառուցման աշխատանքները։
«Թունելը նախագծվել է միջազգային չափորոշիչներին համապատասխան, ապահովված կլինի լուսավորության, օդափոխության, հակահրդեհային համակարգերով։ Արդիական լուծումներ են տրվել կապի, ազդանշանային համակարգերի, արտակարգ իրավիճակների կայանների, էլեկտրոնային, ճանապարահին նշանների ռադիոկայանների և մոնիտորինգային այլ համակարգերի գործարկման համար»,-ընդգծեց նախարարը։
Նրա խոսքով`ճանապարհի սալահատակի տակ կառուցվելու է անվտանգության թունել, որը, միջինում 400 մ հեռավորության վրա, կունենա 14 վթարային ելք։
«Վարկը, որի մասին խոսում ենք, 200 մլն դոլար է, իսկ ՀՀ կառավարության մասնակցությունը 194 մլն դոլար է։ Այս ծրագրի իրականացման արդյունքում ճանապարհը կկրճատվի շուրջ 14 կմ-ով և 50կմ/ժ արագության փոխարեն կանցնենք 80 կմ/ժ միջին արագությամբ, տևողությունը կկրճատվի մոտ 40 րոպեով։ Ինչպես նաև ՀՀ ամենաբարձր լեռնանցքը` Մեղրու լեռնանցքը, որը 2535մ է, այլևս շահագործելու կարիք չի լինի»,- նշեց նա։
ՀՀ կառավարությունը հավանություն տվեց ՀՀ-ի և Եվրասիական զարգացման բանկի միջև վարկային համաձայնագրի կնքմանը։
Մեկնաբանություն