2024 թվականին աշխարհում ավելի քան 670 միլիոն մարդ սովի է մատնվել․ ՄԱԿ

Այսօր սովի և սննդային անապահովության մակարդակը մնում է շատ բարձր։

2024 թվականին մոտավորապես 673 միլիոն մարդ տառապել է սովից, ևս 2.3 միլիարդը՝ բախվել է սննդի պակասի: Այս մասին հայտարարել է ՄԱԿ-ի Գլխավոր ասամբլեայի (ԳԱ) 80-րդ նստաշրջանի նախագահ Աննալենա Բերբոքը։

«Այսօր սովի և սննդային անապահովության մակարդակը մնում է շատ բարձր։ 2024 թվականին մոտավորապես 673 միլիոն մարդ բախվել է սովի, իսկ մոտավորապես 2.3 միլիարդը՝ միջին կամ ծանր սննդային անապահովության», – ասել է նա Սովի և աղքատության դեմ պայքարի գլոբալ դաշինքի ղեկավարների առաջին հանդիպման ժամանակ, որը տեղի է ունեցել Կատարի մայրաքաղաքում՝ ՄԱԿ-ի սոցիալական զարգացման գագաթնաժողովից առաջ։

Բերբոքը նշել է, որ համաշխարհային կազմակերպությունը փաստաթղթավորում է կլիմայի փոփոխության հետևանքով առաջացած «սովի և աղքատության նոր օջախները»։ Որպես օրինակ՝ ՄԱԿ-ի Գլխավոր ասամբլեայի 80-րդ նստաշրջանի նախագահը նշել է Սահելը, որտեղ, ըստ նրա, 50 տարի առաջ բամբակ են աճեցրել։ «Ահա թե ինչպես է սկսվում արատավոր շրջանը։ Կլիմայական անկայունությունը հանգեցնում է սովի և աղքատության։ Դրանք առաջացնում են միգրացիա և հակամարտություններ, իսկ հակամարտությունները սրում են սովն ու աղքատությունը», – նշեց նա՝ հավելելով, որ սովի դեմ պայքարը «ոչ միայն բարեգործության ակտ է, այլև անվտանգության հարց»։

Սոցիալական զարգացման երկրորդ համաշխարհային գագաթնաժողովը, որը կազմակերպվել է ՄԱԿ-ի կողմից՝ Կատարի կառավարության աջակցությամբ, տեղի կունենա Դոհայում նոյեմբերի 4-6-ը։ Մասնակիցները կքննարկեն աղքատության դեմ պայքարի, սոցիալական արդարության ամրապնդման և հավասարության խթանման միջոցառումները։