![ADS](https://abnews.am/wp-content/uploads/2022/04/abnews-ads.png)
![](https://abnews.am/wp-content/uploads/2024/07/ABNSPHOTO-72.png)
Լյուքս դասի ապրանքանիշ Burberry-ի բաժնետոմսերը նվազել են, երբ ընկերությունը հայտնել է շահույթի նվազման և գործադիր տնօրենի փոփոխման մասին: Մեծ Բրիտանիայում տեղակայված ընկերության բաժնետոմսերը իջել են 16.9%-ով՝ հասնելով 9.91 ԱՄՆ դոլարի. դա 2010 թվականից ի վեր գրանցված ամենացածր ցուցանիշն է:
Burberry-ն հայտարարել է նաև,որ գործադիր տնօրենի պաշտոնում Michael Kors-ի նախկին ղեկավար Ջոշուա Շուլմանը կփոխարինի ներկայիս տնօրենին: Հրապարակման մեջ նորաձևության հսկան ֆինանսական տարվա արդյունքները անվանել է «հիասթափեցնող» և նախազգուշացրել, որ լյուքս դասի ապրանքների շուկան սպասվածից ավելի բարդ տարի կունենա:
Google-ի մայր Alphabet-ը մոտ 23 միլիարդ դոլարով կիբերանվտանգության ստարտափ Wiz-ին գնելու գործարք է սկսել: Հաջողելու դեպքում գործարքը կլինի Google-ի երբևէ ունեցած ամենամեծ ձեռքբերումը և կխթանի ամպային հաշվողական բիզնեսը, որը զիջում է Amazon.com-ին և Microsoft-ին:
Wiz-ը ամպային անվտանգության ասպարեզում ամենաարագ զարգացող նորաստեղծ ընկերություններից մեկն է, որն ուներ 1 միլիարդ դոլարի ֆինանսավորում և ստարտափը գնահատվում էր 12 միլիարդ դոլար: 2023 թվականին այն արդեն ուներ 350 մլն դոլարի տարեկան եկամուտ: 2022 թվականին Google-ը 5.4 միլիարդ դոլարով ձեռք է բերել նաև կիբերանվտանգության Mandiat ընկերությունը, որը ճանաչված է ամբողջ աշխարհում՝ պետական համակարգչային հաքերային հարձակումները հայտնաբերելու և արձագանքելու իր հմտությամբ:
Ուոլ Սթրիթի կիսահաղորդչային ինդեքսը կորցրել է ավելի քան 500 միլիարդ դոլար` գրանցելով վատագույն արդյունքը 2020 թվականից ի վեր, քանի որ ԱՄՆ-ը կիսահաղորդչային տեխնոլոգիաների արտահանման ավելի խիստ սահմանափակումներ է մշակում Չինաստանի նկատմամբ:
Չիպերի արտադրության համար սարքավորումներ մատակարարող հոլանդական ASML Holding-ի՝ ԱՄՆ-ում ցուցակված բաժնետոմսերը անկում են ապրել 13%-ով, Nvidia-ն էժանացել է գրեթե 7%-ով՝ կորցնելով ավելի քան 200 մլրդ դոլար շուկայական կապիտալիզացիա: Ավելի փոքր մրցակներ AMD-ն ու Arm-ն էժանացել են մոտ 10%-ով։ Micron-ն ընկել է 6%-ով, իսկ Broadcom-ը՝ 8%-ով։
Միաժամանակ, ԱՄՆ-ում գործող ընկերությունները զգալիորեն շահել են. GlobalFoundries-ն աճել է մոտ 7%-ով, իսկ Intel-ը՝ 0.35%-ով: Ըստ վերլուծաբանների, այս աշխարհաքաղաքական իրավիճակում Intel-ը կարող է առավելություն ունենալ, քանի որ մի քանի նոր գործարան է կառուցում ԱՄՆ-ում:
Nokia Corp-ը հայտնել է 2024 թվականի ֆինանսական երկրորդ եռամսյակի զուտ վաճառքի անկման մասին՝ 18% նախորդ տարվա համեմատ:
Եռամսյակային վաճառքները ցածր են 2015 թվականից ի վեր՝ պայմանավորված բջջային ցանցի արդիականացման մեջ կատարված քիչ ներդրումներով։
Ցանցային ենթակառուցվածքի վաճառքները տարեկան կտրվածքով նվազել են 11%-ով` պայմանավորված ցածր պահանջարկով:
Բջջային ցանցի վաճառքները նվազել են 24%-ով՝ պայմանավորված Հնդկաստանում վաճառքի ցածր ցուցանիշով:
Հունիսին Nokia-ն 2.3 միլիարդ դոլար է ներդրել AI-ի վրա հիմնված տվյալների կենտրոնների ծառայությունների վրա ՝ ձեռք բերելով Infinera-ն: Բացի այդ, Nokia-ն նախատեսում է իր՝ ստորջրյա մալուխային բիզնես Alcatel Submarine Networks-ը վաճառել Ֆրանսիայի կառավարությանը: Ընկերության մեկ բաժնետոմսի արժեքը հուլիսի 19-ի դրությամբ կազմել է 3.6 ԱՄՆ դոլար:
ԴԻՄԵՔ ՄԵԶ՝
+374 11 888 118
Մենք օգնում ենք կառավարել ձեր խնայողությունները՝ ներդնելով միջազգային շուկաներում: Նպատակն է ապահովել բարձր եկամտաբերություն և ստեղծել անվտանգության բարձիկ:
Կազմակերպությունը վերահսկվում է ՀՀ Կենտրոնական Բանկի կողմից
Մեկնաբանություն