Evocabank-ը կներգրավի 10 մլն ԱՄՆ դոլար և ևս մինչև 10 մլն ԱՄՆ դոլար սինդիկացված վարկ` վարկավորումն ընդլայնելու, տեղական բիզնեսներին աջակցելու և Հայաստանի տնտեսական աճը խթանելու համար:
Evocabank-ը համագործակցության նոր պայմանագիր է ստորագրել Համաշխարհային բանկի խմբի անդամ IFC-ի հետ: Այս համագործակցության շրջանակներում IFC-ն Evocabank-ին կտրամադրի 10 մլն ԱՄՆ դոլարի վարկ, որը հնարավորություն կտա Բանկին ընդլայնելու վարկավորման հնարավորությունները:
Evocabank-ի և IFC-ի համագործակցության նպատակը ֆինանսական ռեսուրսների հասանելիության մեծացումն է միկրո և փոքր ձեռնարկությունների, հատկապես՝ կլիմայական փոփոխություններին առնչվող և կանանց կողմից ղեկավարվող ընկերությունների համար:
Փոքր ձեռնարկությունները Հայաստանի տնտեսական աճի, նորարարությունների և զբաղվածության ապահովման հիմնական շարժիչ ուժն են: Միկրո, փոքր և միջին ձեռնարկությունները` ՄՓՄՁ-ներն են ապահովում աշխատատեղերի զգալի մասը: Սակայն նրանք ունեն շուրջ 1.1 մլրդ ԱՄՆ դոլար միջոցների պահանջարկ` պայմանավորված այնպիսի խոչընդոտներով, ինչպիսիք են գրավի բացակայությունը կամ ֆինանսների կառավարման հմտությունների ոչ բավարար մակարդակը: Կանանց կողմից ղեկավարվող ՄՓՄՁ-ներն ավելի մեծ խնդիրների են հանդիպում, քանի որ դրանցից շատերը գրավադրման կամ բանկերից վարկ ստանալու ավելի քիչ հնարավորություններ ունեն:
IFC-ն Evocabank-ին կտրամադրի 10 մլն ԱՄՆ դոլարի վարկային միջոցներ, ինչպես նաև ՄՓՄՁ-ներին վարկավորելու նպատակով այլ գործընկերներից կներգրավի ևս 10 մլն ԱՄՆ դոլար: Վարկային միջոցների կեսը կուղղվի կլիմայական փոփոխություններին առնչվող նախագծերի վարկավորմանը, իսկ 25 տոկոսը՝ կանանց կողմից ղեկավարվող ձեռնարկություններին: Այս համագործակցությունը կօժանդակի կլիմայի փոփոխությունների ֆինանսավորման ընդլայնմանը և կանաչ վարկավորման չափորոշիչների տարածմանը:
Evocabank-ի Վարչության նախագահ Կարեն Եղիազարյանը նշեց.
«Մենք ուրախությամբ հայտարարում ենք IFC-ի և Evocabank-ի երկարաժամկետ հաջող գործընկերության շրջանակներում իրականացվող հերթական նախագծի մեկնարկը: Այս համագործակցությամբ Բանկին կտրամադրվի 10 մլն ԱՄՆ դոլարի վարկ և ևս մինչև 10 մլն ԱՄՆ դոլարի սինդիկացված վարկ, որը կուղղվի միկրո, փոքր և միջին ձեռնարկությունների ֆինանսավորմանը՝ հատուկ ուշադրություն դարձնելով կլիմայական փոփոխություններին և կանանց կողմից ղեկավարվող նախաձեռնություններին:
Կարևորելով տնտեսության այն ոլորտները, որոնք շրջակա միջավայրի կայունության շարժիչ ուժն են և առաջ են մղում գործարար կանանց նախագծերը՝ Evocabank-ն ապացուցում է հանրության կյանքում զգալի ազդեցություն թողնելու իր նպատակը: IFC-ի հետ միասին մենք կերտում ենք ավելի պայծառ և ներառական ապագա Հայաստանի տնտեսության համար»:
IFC-ի Հարավային Կովկասի Տարածաշրջանային տնօրեն Իվանա Ֆերնանդես Դուարտեն նշեց.
«Փոքր ձեռնարկությունները Հայաստանի տնտեսության հիմնաքարն են, սակայն դրանցից շատերն աճելու և զարգանալու համար պայքարում են ֆինանսական միջոցներ հայթայթելու համար: Evocabank-ի հետ մեր համագործակցությունը նպատակ ունի օգնել լրացնելու այս բացը: Նպատակաուղղված լինելով օժանդակություն ցուցաբերել կլիմայի փոփոխություններին առնչվող նախագծերին և կանանց կողմից ղեկավարվող ձեռնարկություններին՝ մենք ընդլայնում ենք այն հնարավորությունները, որոնք նպաստում են նորարարություններին, կայունությանը և ներառական տնտեսության աճին»:
IFC-ն Evocabank-ի հետ համագործակցում է 2021 թվականից, երբ Բանկը ֆինանսավորման ընդլայնման և առևտրի վարկավորման նպատակով ստացավ 15 մլն ԱՄՆ դոլարի վարկ` ուղղված համավարակից հետո ՄՓՄՁ-ների կայունության պահպանմանը, վերականգնմանը և զարգացմանը: 2022 թվականին COVID-19-ի ազդեցություն ներքո փոքր ձեռնարկություններին ֆինանսական միջոցների հասանելիությունն ապահովելու նպատակով IFC-ն ևս 15 մլն ԱՄՆ դոլար վարկային միջոցներ տրամադրեց Evocabank-ին:
Բացի այդ, լինելով նորարար թվային ծառայություններ մատուցող Բանկ` Evoca-ն մասնակցել է IFC-ի DigiLab ծրագրին: Ծրագիրը նպատակ ուներ օժանդակելու Բանկի թվայնացման ռազմավարությանը և ճանապարհային քարտեզի մշակմանը՝ տեղական շուկայի կարիքներին համապատասխան նորարարությունների շնորհիվ Բանկի հաճախորդներին առավել բարձրորակ ծառայություններ մատուցելու նպատակով:
