Տեխնոլոգիական ընկերությունների մենեջերներին երկու տարվա ազատազրկում է սպառնում, եթե բրիտանական կանոնները չկատարվեն Տեխնոլոգիական ընկերությունների ավագ մենեջերներին սպառնում է մինչեւ երկու տարվա ազատազրկում, եթե նրանք չկատարեն բրիտանական կանոնները, որոնք ուղղված են համացանցի օգտատերերի համար առցանց անվտանգության ապահովմանը, հայտարարել է Մեծ Բրիտանիայի կառավարությունը: Ինտերնետի անվտանգության հավակնոտ, բայց վիճահարույց օրինագիծը կարգավորող մարմիններին լայն լիազորություններ կտրամադրի՝ թվային եւ սոցիալական մեդիա ընկերություններին, ինչպիսիք են Google-ը, Facebook-ը, Twitter-ը եւ TikTok-ը, ճնշելու համար, հայտնում է AP-ն: Թեեւ համացանցը փոխել է մարդկանց կյանքը, «տեխնոլոգիական ընկերությունները պատասխանատվության չեն ենթարկվել, երբ նրանց հարթակներում մոլեգնել են վնասը, չարաշահումները եւ հանցավոր վարքագիծը»,- ասվում է Մեծ Բրիտանիայի թվային տեխնոլոգիաների նախարար Նադին Դորիսի հայտարարության մեջ: «Եթե մենք չգործենք, կարող ենք անվերահսկելի ալգորիթմներին զոհաբերել երեխաների անթիվ սերունդների բարեկեցությունն ու անմեղությունը»: Բրիտանացի օրենսդիրները դեռ պետք է քվեարկեն օրինագծի ընդունման օգտին, նախքան այն օրենք կդառնա: