ՀՀ ներքին գործերի նախարարությունն ամփոփել է Ազգային ժողովի ընտրությունների օրվա ընթացքում արձանագրված ենթադրյալ իրավախախտումների վերաբերյալ տվյալները: Քվեարկության օրվա ժամը 17:00-ի դրությամբ ՆԳՆ օպերատիվ կառավարման կենտրոնի «112» հեռախոսահամարին և «87-67» թեժ գծին ստացվել է 57 ահազանգ։
Արձանագրված հանցագործություններն ու իրավախախտումները
ՆԳՆ փոխանցմամբ՝ ահազանգերից մի մասով արդեն իսկ կազմվել են համապատասխան փաստաթղթեր և փոխանցվել նախաքննական մարմիններին: Խնդրահարույց դեպքերի պատկերն ըստ ուղղությունների ունի հետևյալ տեսքը.
Կրկնաքվեարկության փորձ/դեպք — 19 դեպք,
Քվեարկության գաղտնիության խախտում — 15 դեպք,
Ընտրական իրավունքի իրականացմանը խոչընդոտում — 2 դեպք,
Ընտրակաշառք տալու կասկածանք — 1 դեպք,
Ընտրատեղամասում սառը զենք կրելու դեպք — 1 դեպք:
Օպերատիվ տվյալ. Նշված իրավախախտումների և հարուցված վարույթների շրջանակներում իրավապահ մարմինների կողմից արդեն իսկ ձերբակալվել է 14 անձ:
Ստուգման և մոնիթորինգի փուլում գտնվող տվյալները
Բացի արդեն իսկ հասցեավորված դեպքերից, ՆԳՆ ծառայությունները ստուգում են ենթադրյալ իրավախախտումների վերաբերյալ ստացված ևս 198 տեղեկություն: Զուգահեռաբար, ոստիկանության համապատասխան ստորաբաժանումները շարունակում են մամուլի և սոցիալական հարթակների մոնիթորինգը՝ ընտրական գործընթացին առնչվող հնարավոր իրավախախտումների վերաբերյալ հրապարակումները հայտնաբերելու և դրանց իրավական ընթացք տալու նպատակով։
