Հանրապետությունում տիրող բարձր հրդեհավտանգ իրավիճակի և «Խոսրովի անտառ» պետական արգելոցի տարածքում առկա խիտ խոտածածկույթի պատճառով՝ հուլիսի 12-ին արգելոցը փակ կլինի բոլոր տեսակի այցելությունների համար։ Այս մասին տեղեկացնում է ՀՀ շրջակա միջավայրի նախարարությունը։
Հնարավոր հրդեհների առաջացումն ու դրանց ծանր հետևանքները կանխելու նպատակով նախարարությունը հորդորում է քաղաքացիներին ցուցաբերել առավելագույն զգոնություն և արգելոցի ու հարակից տարածքներում խստորեն պահպանել հրդեհային անվտանգության հետևյալ կանոնները.
Բաց կրակ և թափոններ. Չնետել այրվող լուցկի կամ չմարված ծխախոտի մնացորդներ, չայրել չոր խոտ կամ կենցաղային աղբ։
Խարույկների վառում. Խարույկ վառել բացառապես դրա համար նախատեսված հատուկ վայրերում, իսկ տարածքից հեռանալուց առաջ այն ամբողջությամբ մարել ջրով կամ հողով։
Ապակյա թափոններ. Բնության մեջ չթողնել ապակյա շշեր կամ բեկորներ, քանի որ դրանք արևի ճառագայթների տակ գործում են որպես ոսպնյակ և կարող են հրդեհի բռնկման պատճառ դառնալ։
Նախարարությունը հայցում է քաղաքացիների աջակցությունը «Խոսրովի անտառ» պետական արգելոց» ՊՈԱԿ-ին, Էկոպարեկային ծառայությանը և ՆԳՆ Փրկարար ծառայությանը՝ անտառային հրդեհների կանխարգելման և արգելոցային ռեժիմի պահպանության հարցում։
