Սպիտակ տունը Թրամփի «365 հաղթանակների» ցանկում նշել է Հայաստան–Ադրբեջան խաղաղության պայմանագիրը

Գործընթացը դիտարկվում է որպես ԱՄՆ միջնորդական և դիվանագիտական ջանքերի արդյունք։

Սպիտակ տունը հրապարակել է ԱՄՆ նախագահ Դոնալդ Թրամփի պաշտոնավարման առաջին տարվա՝ 365 օրերի ընթացքում արձանագրված 365 «հաղթանակների» պաշտոնական ցանկը։

Ցանկի 143-րդ կետում որպես ձեռքբերում նշվում է Հայաստանի և Ադրբեջանի միջև խաղաղության պայմանագրի կնքումը։ Սպիտակ տան գնահատմամբ՝ այս գործընթացը դիտարկվում է որպես ԱՄՆ միջնորդական և դիվանագիտական ջանքերի արդյունք։

Միաժամանակ, ցանկի 149-րդ կետում նշվում է նաև, որ ԱՄՆ-ի աջակցությամբ ստեղծվել է Ուկրաինայի և Ռուսաստանի միջև պատերազմը դադարեցնելու շրջանակ, որը ներառում է հրադադարի պարտադիր ժամկետների սահմանում և հետպատերազմյան վերականգնման խթանների մեխանիզմներ։

Սպիտակ տան հրապարակման մեջ ընդգծվում է, որ նշված նախաձեռնությունները համարվում են Թրամփի վարչակազմի արտաքին քաղաքական առանցքային ձեռքբերումներից՝ ուղղված գլոբալ անվտանգության ամրապնդմանը և հակամարտությունների քաղաքական կարգավորմանը։

Հրապարակված ցանկը ներառում է ինչպես արտաքին քաղաքական, այնպես էլ ներքին տնտեսական, սոցիալական և անվտանգության ոլորտներին առնչվող նախաձեռնություններ, որոնք Սպիտակ տունը ներկայացնում է որպես ԱՄՆ նախագահի պաշտոնավարման առաջին տարվա հիմնական արդյունքներ։